Sports chu insawizawina satliah mai niloa, eizawnna tha leh ngelngheta hman tumin Mizoram sawrkarin sports infrastructure tha zawk dinin, a bulthut (grassroot) atangin a thuamtha mek tih chief minister Zoramthanga chuan a sawi.
Aizawl Smart City Ltd. hnuaia cheng vaibelchhe 25.66 senga Zemabawk playground sak thar tur lungphum chu Thawhlehni kha chief minister hian a phum a. Zemabawk playground chu Aizawl hmarlama awmte tan infiamna hmun pawimawh tak niin, tunhma atanga a siamthatna tur ngaihtuah fo tawh a nih thu a sawi. Smart City project hnuaiah beisei phak aia tha tura hmalakna a awm ta chu lawmawm tiin, ruahman anga tha taka thawktuten an thawh a beisei tih a sawi a ni.
Sawrkarin sports tihhmasawna kawngah hma a la a, infiamna chu taksa sawizawina satliah mai niloin, eizawnna tha leh ngelnghet tak a nih theih zia kan infiammi hlawhtling tak takte atangin kan hmu tih a sawi. “Sports hi industry a ni a, thalai a tuimi leh talent neiten chutiang kawnga an kal theihna’n sawrkar chuan sports infrastructure tha zawk din a, a bulthut (grassroot) atangin thuamtha in hma a la a ni,” a ti. Football mai nilo sports discipline hrang hrangah hma lak a nih thu a sawi bawk.
Sports infrastructure bakah kawng hrang hrangah a remchan dan angin hma lak a ni tih chief minister hian a sawi a. Hun khirh tak tak leh harsatnate awm thin mah se, economy-in chak zawka hma a sawnna tur kawng a inhawn zel a beisei thu sawiin, “Hun khirhte a daihrei ngailoa, mi tumruhte an dairei zawk thin,” a ti.
Aizawl mayor Lalrinenga Sailo pawhin thu sawiin, hmasawnna chu ngaiah a neih theih a, chik taka ngaihtuah thin tan chuan kum 10 chhungte, kum 5 chhung chauh pawhin Mizoramin hma a sawn nasa hle tih a sawi. State sawrkarin ei leh barah hmasawnna ruhrel leh kawng hrang hranga nasa taka hma a lak thu te, hetiang ro tling hmasawnna kan neih leh din mekte hi mipui lamin hlut nachang kan hriat a, dimdawi leh hman tangkai kan tum a pawimawh ve bawk thu te a sawi. Mizoram chu chhe lailet der anga sawi a awm thin chu pawi a tih thu sawiin, hmasawnna leh insiamthat ngaihna awm tho mah se, state pawn mite pawhin kan khawtlang nun leh inrelbawl danah entawntlak an rawn tih tam tak kan nei tih a sawi a ni.
Zemabawk Playground hi Aizawl Smart City hnuaia playgorund sak tawhah chuan a man a la tam ber tih official-te chuan an sawi a. Contractor chu M/s Northeast consultancy Services (NECS) niin, kumin October 15-a zawh tura ruahman a ni. Playground bakah 4-wheeler 45 dah theihna leh 2-wheeler 61 dah lenna ruahman a nih bakah gallery pahnih – mi 1033 thut lenna leh mi 758 lenna tur leh tul dangte ruahman a ni.
Sawrkarin thalaite tan sports infrastructure tha a din – CM
Get real time updates directly on you device, subscribe now.