Saza humhalh lai kut tuarin a thi

November 10 khan Serchhip leh Keitum inkarah saza hliam tuar chhar a ni a, a hnu ah a thi zui. He saza hi Forest department-in a humhalh lai a ni.
Thudawn danin kar kalta Zirtawpni chawhnu dar 1.30 vel khan Serchhip leh Keitum inkara kawngpui siam hna thawk hnamdangte chuan kawng bula saza hliam tuar hmu in Forest department an hriattir a. Forest hotute an thlen chuan a lo thi hman a ni.
A ruang hi Serchhipa lak niin AH & Vety department-in an post mortem a, a pumah silaia kahna hmuh a ni. Silaia kahna hliam hi thihpui tham nia ngaih a nih loh laiin, a pumah thi a tling a, no a pai mek bawk. A no neih hun a hnai tawh bawk nen, silaia kah a nihna lama a hlauhlawp tlanchhia hi, a nau pai a hram tawh nen a chesual zui ta nia rin a ni.
Kumin October 31 khan Thenzawl DFO chuan mipui hriattirna tichhuakin, Serchhip leh Keitum inkarah Mizoram state animal – saza in awmhmun a khuar a, humhalha kut thlak lo tur leh, saza hi dan hmanga ramsa humhalh bik an nih avangin kut thlak luite chu kum 3 atanga kum 7 thleng lung in tan leh sumfai Rs. 10000 thleng chawitir theih an ni tih a lo sawi tawh a ni.
Saza kut thlak nia lang chungchangah hian Serchhip Police Station ah Forest department hian FIR a thehlut a ni.