SC-in Wrestler te ngenna ngaihtuah dawn
Supreme Court chuan Wrestling Federation of India president leh BJP MP Brij Bhushan Sharan Singh laka wrestler hmeichia pasarih tena mipat hmeichhiatna thila puhna an siam chu an ngaih thutak takzet thu a tarlang.
Chief Justice of India DY Chandrachud kaihhruai Bench chuan tunkar Zirtawpni hian he case hi ngaihtuah turin a ti nghal a.
Bench chuan petitioner te ngenna angin an identity te chu court record atangin hriat theih loha dah tur a ti bawk a. Court chuan an petition leh record te chauh chu public domain-a tarchhuah tur a ti bawk.
Court chuan formal notice tichhuakin petitioners liberty phalsakin an petitioner chu Delhi sorkar cpunsel hnenah copy an pek a remti bawk.
Senior advocate Kapil Sibal, heng hmeichhe wrestler pasarih te aiawha ding chuan a hmaa FIR an thehluh te pawh police te chuan case an siamsak duh lo a ti a. Petitioner pakhat chu sexual harassment a puhna kalpui laiin kum tling lo a la ni a ti bawk a.
“FIR ziah luh a nih lohna chhan chu puha ber chu rorel lai party a Member of Parliament a nih vang a ni,” tiin Sibal chuan a sawi.
Chief Justice Chandrachud chuan Section 156 of the Code of Criminal Procedure hnuaiah dam zawka siam theih niin he mi hmang vek hian Magistrate chuan investigation order tichhuak thei tur a ni a ti a.
“Eng vangin nge police ten FIR an ziah luh duh loh tih te pawh ngaihtuah a ni ang. Sexual harassment a awm ngei tia puhna a awm a, video recording pawh a awm a ni” tiin Sibal chuan a sawi.
Sibal chuan petitioner tena complaint an siam te chu sealed cover a theh luh a nih thu a sawi a. “Complaint siamtu hnuhnung ber chu kum tling lo a ni a, khatih lai khan kum 16 chauh a la ni a. Puha ber chu Wrestling Federation of India president a ni. Police officer te ngei pawh hetiang thila FIR an ziah luh duh loh avanga hrem theih an ni” tiin Sibal chuan a sawi bawk.
Thupek a siamah court chuan puhna awm chu an ngaih thutak takzet thu a tarlang bawk a. Court chuan petitioner te chu wrestler India aiawha chhuakte niin chutih karah chuan an lakah mipat hmeichhiatna thila mawi lo taka sawngbawlin an awm a ni, a ti bawk.