Scheduled bank nih thar sawipui

Cooperation department, National Bank for Agriculture and Rural Development (NABARD) leh Mizoram Cooperative Apex Bank (MCAB) Ltd. hotute chuan Ningani khan larsap Gen. Vijay Kumar Singh (Retd) chu Lok Bhavan-ah hmuin, tunhnaia ‘scheduled bank’ dinhmuna MCAB Ltd. hlankai a nih chungchang bakah hmalakna dang an sawipui.
Larsap chuan Mizoram Cooperative Apex Bank Ltd.-in scheduled bank dinhmun a thleng thei chu a lawmpui tih sawiin, scheduled bank an nih tawh avangin state sawrkar hnuaia department-te pawhin dan ang takin an dawr theih tawh dawn tih a sawi. Cooperative bank-te chu mipui nawlpui tana dawr theih an nih avangin tun aia hmasawn lehzual tuma theihtawp chhuah turin a chah a ni.
Cooperation commissioner & secretary Udit Prakash Rai, registrar of Cooperative Societies John LT Sanga, NABARD general manager Pankaja Borah bakah MCAB Ltd. atangin chairman Lalnunsanga, vice chairman Lalrinchhana, director Rosiamliana Ralte, CEO P Lalsawmliana leh DGM Vanlalhriata, an tel.
MCAB Ltd. hian scheduled bank status a hmu thar a. Kumin April 15-a tihchhuah Gazette of India-a tarlan danin, Second Schedule of Reserve Bank of India Act 1934 ah telh a ni ve dawn ta a ni.