Scholarship pe theiten minister hmu

On Oct 9, 2025 4 0

Scholarship pe theiten minister hmu
School Education minister Dr Vanlalthlana chuan Thawhlehni khan Mizoram House New Delhi-ah Vahani Scholarship Trust hotute a kawm.
Vahani Scholarship Trust managing director Rashmani Singh chuan minister an hmuh duh chhan chu zirlai harsa, lehkha thiam si te tanpui an duh tih a sawi a. An Trust hian Mizoram zirlaite pawh puih an inhuam reng tih hma lakpui turin a sawm a ni.
Vahani Scholarship hi pawl 12 zirlaiten an dil thei a. Pawl 10-a 85% mark hmu chin, kum khata chhungkaw sum lakluh cheng nuai thum aia tlemten an dil thei. Dilna leh interview hi online-a tih thin a ni a, kumtin dil theih hun hi October 1 atanga November 1 chhunga hawn a ni.
Zirna sang zawka institution tha leh belh tlaka zirlaiten an zirna an chhunzawm theihnan Vahani Scholarship Trust hian kawng hrang hrangin a pui thin a. He scholarship hian academic fee, tuition fee, hostel fee, textbook man, laptop stipend, internet stipend leh zin veivahna senso a huam a; undergraduate course an zir chhung zawngin mentor an pe bawk. Career counselling, internship leh skill development-ah kaihruaiin hna zawn thlengin zirlaite an pui thin a ni.
Higher & Technical Education leh ICT minister ni bawk Dr Vanlalthlana hian Thawhlehni vek khan NITI Aayog-a distinguished fellow, chief architect Debjani Ghosh a kawm a. Mizoram Engineering College (MEC) syllabus tur chungchang a sawipui.
MEC zirlaiten industry-relevant skill an neihna turin tunlai mila syllabus leh curriculum duan a nih theihnan NITI Aayog chu thawhpuiah a sawm a. Mizorama technology leh engineering zirna in sang awm mek MZU leh NIT bakah MEC chu hmang tangkai a, Mizoram thalaite tana information technology hmanga eizawnna tam zawk siamsak an nih theih dan a sawipui.
Software Technology Park of India (STPI) mumal leh changtlung zawka kalpui a nih theihnan NITI Aayog chu thawhpuiah minister hian sawmin, Mizorama Technology Hub din a nih theihnan state sawrkar hmalakna lo thlawp thin turin a ngen bawk.