MINECO-a Mizoram State Library chu school naupang tan kalna a hlat tham deuh avangin naupang school uniform ha hmuh tur an awm mang lo nia sawi a ni.The Aizawl Post-in Mizoram State Library (MSL) a tlawhnaah State Librarian Zirsangzuali chuan hei hi a lo a sawi a. College zirlai mahnia lirthei nei chin kal an tam thu leh nilenga lehkha zir tura kal an awm thin thu a sawi.
Khawpui hmun laili deuha school naupang puala library siam chu thil tha tak a nih rualin, siam a hautak tur thu State Librarian hian a sawi a. State Library chuan zirlai exam hrang hrang hmachhawn turte tan a awlsam zawk nan Aizawl Smart City Project hnuaiah e-Library an peihfel tep tawh thu sawiin, Mizo tawnga ziak lehkhabu engemawzat scan-a dah an tum thu a sawi. MSL website-ah link hmanga awlsam taka hman theih a nih tur thu a sawi bawk.
MSL chuan internet center an neih avangin Delnet atangin e-books leh e-journals a thlawnin member-ten an hmang thei tawh a; hei bakah hian mitdelten awlsam taka lehkhabu an chhiar zung zung theih nan ‘talking software’ bakah hmanraw chi hrang hrang an lakhawm mek a, kumin chhunga hawn hman turin an ruahman a ni.
MSL-ah hian lehkhabu 70807 awmin, general – 47681, naupang pual – 5699, Hindi – 17427 a awm a. Library member hi tunah puitling 7222 leh naupang 1291, an vaiin 8513 an ni. MSL hnuaiah hian khaw hrang hrangah recognised library 513 a awm a, Ministry of Culture RRRLF scheme atangin kumtin lehkhabu 80 atanga 100 theuh an dawn bakah library building tih changtlunna tur sum an sem thin. Library tlawhtu hi chawhrualin nitin mi 20 vel awm thin anga chhut a ni.
Thawktute an indaih lo hle a, thawktu ah hian a nghet mi 8 leh a nghet loa chhawr 7 an awm. Post ruak a awm nual a, state librarian Zirsangzuali hi library professional awmchhun a ni rih.
School naupang uniform ha library-a kal hmuh tur tlem
Get real time updates directly on you device, subscribe now.