Scotland in Euro an hnaih

Euro 2024 khel tur zawnnaah Zirtawp zan khan Scotland chuan an khingpui Cyprus chu si thum faiin an hneh a, point thum an hmuh belh. Rin phak baka chetha Scotland hian Euro 2024 khelh phak an hnaih leh zual a, inelna lian hmachhawn thei turin khelh hnih khelh hmabak an la neihah point hnih chiah an mamawh tawh. Zirtawp zana inkhel dangah Spain in 7-1 ngawtin Georgia an sawp a, goal khat thuntu Lamine Yamal chuan Spain record thar a siam.
Group A-a hmahruaitu Scotland hian Cyprus chu AEK Arena-ah an luhkhung a, an chetha leh pek hle. Cyprus an hnehna goal thumte hi dakkar chanve chhunga an thun vek a ni nghe nghe. He inkhelah hian minute rukna lekah Scott McTominay chuan Scotland hmahruaina goal a thun. Hma takah goal an thun vangin inrintawkna sang zawk nen an inlan chhunzawm a, goal an thun belh leh thuai bawk.
Minute 16-na lekah Ryan Porteous chuan Hendry siamsak atangin an goal hnihna a thun a, an hmahruaina a tizau. Goal hnih an thun hnuin an khel tha chhunzawm a, na takin an khingpuite an nawr chhunzawm a, goal an thun belh vat. Minute 30-naah goal hmahruai thuntu Scott McTominay siamsak atangin John McGinn chuan an goal thumna a thun zui leh. Minute 30 chhung lekin goal thum ngawt thun bawk mah se Scotland hian hun tawp thlengin goal an thun belh thei tawh bik lova, Mimualah si thum faia chakin, point thum an hmuh belh leh ta a ni.
Cyprus lakah point thum an hmu leh tak vangin Scotland hian khelh nga atangin point 15 an hmu a, inkhel an hmachhawn tawhah an la chak fai vek. Khelh nga atang hian an khingpuite lakah goal 12 ngawt an thun tawh laiin goal 1 chiah an chhuah thung. An chetthat tluan vangin Euro 24 khel turin an tling tep tawh a, inelna lian hmachhawn turin point hnih chiah an mamawh tawh. Scotland hian an hnuai chiaha awm Spain leh Georgia an hmachhawn zui leh dawn a, an khingpui leh turte lakah point thum an hmu thei lo a nih pawhin tlawm an pumpelh ve ve thei a nih chuan Euro 2024 khel turin an tling tawh dawn a ni.
Group A-ah hian khelh thum atanga point ruk hmu Spain in pahnihna an luah mek a. Norway leh Georgia ten point li ve ve an hmu mek a. Table mawngphah Cyprus in point an la hmu ve lo thung.
Spain record thar siamtu Yamal
Group A-ah pahnihnaa inhlangkai kai turin Spain chuan zirtawp zana an khingpui Georgia chuan 7-1 ngawtin an khingpui Cyprus an sawp. Cyprus an sawp tum hian Lamine Yamal chuan an goal sarihna a thun a, Spain tana goal thun thei naupang ber record thar a siam zui nghal.
Spain hian Boris Paichadze Stadium-a an khingpui Cyprus sawp viau mah se bul erawh an tan tha vut bik lo a, minute 22-naah hmahruaina goal an thun chauh. Minute 22-naah an forward tawnhriat ngah Alvaro Morata chuan hmahruaina goal a thun. Morata hian minute 40-na leh minute 66-naah goal a thun belh leh a, hattrick a siam nghe nghe.
Morata hmanga Spain in hma an hruai hnu hian Cyprus player Solomon Kvirkvelia chuan an lamah ti-goal palhin Spain goal hnihna a thun. Spain tan hian Dani Olmo leh Nico Williams ten goal an thun bawk. An goal hnuhnung ber hi bench atanga lut Lamine Yamal chuan minute 74-naa a thun a ni. Spain goal sarihna thuntu Yamal hi kum 16 leh ni 57 leka upa a ni a, Spain tana goal thun thei naupang ber a ni nghal. Yamal hian kum 17 leh ni 62-a upa ni chunga Spain tana goal thun Gavi record a khum. Lamine Yamal hian April, 2023 khan FC Barcelona tan a vawi khat nan a khel a, Barcelona senior team tana La Liga-a khel thei naupang ber record a lo siam tawh bawk.