Scouts & Guides intawhkhawm

Scouts & Guides intawhkhawm
Bharat Scouts & Guides Mizoram State Training Centre Tanhrilah Bharat Scouts & Guides North East Mini Jamboree vawi 8-na chu Inrinni khan Mizoram Bharat Scouts & Guides president, chief minister Lalduhoma chuan a hawng.
Chief minister chuan Mini Jamboree-a tel hun nuam taka hmang tura chahin, “Kan awmna ram bial, kan tawng leh kan nunphung chu danglam mah se, inrem takin kan cheng ho thei a, ram tan kan thawk ho thei. Chu chu kan chakna hnar a ni. Tangruala hma kan laknaah chuan kan hlawhtling thin,” a ti.
BSG thil tum ber pawh tangruala India tha zawk din a ni tih Lalduhoma hian sawiin, Jamboree neih chhung hian thil hrang hrang an tihnaah thian tharte hlimna thlentu ni theuh turin a chah bawk.
BSG chief national commissioner Dr KK Khandelwal pawhin chief minister Pu Lalduhoma’n phur taka hma a lo lakpui thin dan an hria a; BSG tana a thawhhlawk avang hian national award sang ber – Silver Elephant Award dawng turin an thlang tih a sawi. He award dawng tura an rawtna DO letter hi chief minister hnenah a hlan nghal.
He award hi President of India-in a hlan thin a, hun remchang hmasa bera a dawng turte hnena hlan tur a ni.
Mini Jamboree hian November 28 thleng a awh dawn a. Hemi chhung hian thil chi hrang hrang an zirin an tiho ang. Tun tum hi Mizoramin North East Mini Jamboree a thlen vawi hnihna a ni a. India hmarchhak bik tana ruahman a ni na in, hmarchhak pawn state dang atanga rawn kal pawh engemawzat an awm a, mi 300 vel an tel a ni.