SDG tihhlawhtlinna atan Gender budgeting inzirtir

Social Welfare, Tribal Affairs, Women & Child Development department huaihawtin gender budgeting chungchanga midangte zirtir leh chhawng turin sawrkar department thlan bik amite chuan Thawhtanni khan Aizawlah ni khat awh training an nei.
Training hmanpuitu SWTAW&CD principal secretary KT Beicho chuan midangte zirtir chhawng leh theitu tur thlan bik department leh training institute an nih angin gender budgeting pawimawhna midang hrilhhriaa theihtawp chhuah turin a fuih a. Sustainable Development Goals (SDG) 17 zinga 5-na chu intluktlanna chungchang (gender equality) a ni, tiin, “SDG hmachhawp zingah kum 2030-ah chuan hnufual bik awm loa intluktlang thei tura hmalakna a ni a. Hmeichhia leh mipa intluktlan theihlohna awmte hnawh khah a nih a, a inchen lote inchen tir a nih theihnan gender budgeting hi a tangkai hle a ni,” a ti.
Sawrkar department tin ten an ngaihthah theih loh tur leh ralbang bik awm loa an tan tlan a ngaihna chu gender budgeting a nih thu te, gender budgeting atana hma la tur nodal department chu Women & Child Development niin, Mizoram pum atana nodal officer turin Women & Child Development director pawh sawrkar pawmpuiin ruat a nih tawh thu te a sawi a. Department tinah Gender Budget Cell din a nih theihnan hma lak a nih thu sawiin, “Ramin hma a sawn theihna tur chuan a hmei a pa, naupang atanga puitling thlengin tlabal bik lai awm loa an mamawhna zawn theuha tih chak an ngai a, chumi tichak tur chuan gender budgeting hi a pawimawh a ni,” SWTAW&CD principal secretary hian a ti.
Training-ah hian UN-WOMEN lam mithiam, Gender Responsive Budgeting programme lead Dr Sanghamitra Dhar chuan a zirtir a ni.