Season thara Kane-a league goal hmasaber a hmin ta!

Season thara Kane-a league goal hmasaber a hmin ta!
August 2023-a Tottenham Hotspurs chhuahsana Bayern Munich a zawm hnuah England captain Harry Kane chuan Germany ramah goal a khung mar tha hle a, mahse, tun season-a league match an khelh hmasa pahnihah a nil a, Pathianni zan Bundesliga inkhel pakhata a team-in 2-1-a mualneitu Elversberg an hnehna inkhelah erawh chakna goal thawh lehin, ti hian, Bavarians tan goal 150 a tilut tling ta hial a ni.
German champion fehchhuak hian kai thar Elversberg lakah hnehna hraw tak an chang zo bik lo a; first half minute 26-a Kane siamsak atanga Lennart Karl-a goal hmahruai thun bak first half chhungin goal dang an hlawhchhuak zo lo.
Chu pawh second half tir lam minute 61-ah an hmahruaina hlohin, Maurice Krattenmacher chuan mualneitu team siphurh a sut.
An beih ngial hnu minute 72-ah hun khirhkhana Bayern chhanchhuaktu ni thang Kane chuan chakna goal ni zui ta a thawh thei hram a, khelh thuma vawi hnih chakin, draw vawi khat nei tawh Bayern hian point sarih nen table-ah palina an luah a, hmahruaitu Freiburg lakah point hnihin an la hniam.
Mipui 13,000 lek chenna Elversberg kha an Bundesliga season hmasaberah an inthlahrung lutuk lo a, an khelh tawhah club lian pahnih Bayer Leverkusen leh Borussia Moenchengladbach hneh tawhin, defending champion pawh an chai leh thei fu a; point ruk an neih ve tawh hmangin table-ah parukna an luah pha hial.
Munich chakna goal khungtu Kane khan Bundesliga match 97 a khelh tawh atangin goal 99 a thun tling der tawh a, 2026-27 league campaign-ah erawh a goal khatna a ni thung.
Tarlan tawh angin, Englishman hian Bayern tan inelna hrang hrangah game 153 atangin goal 150 a thun tling tawh a, kum 33 mi hi thla thar maia London khawpuia 2026 Ballon d’Or n semchhuah dawng thei tura rinkai langsar zingah a tel mek.