US Open champion Alexander Zverev

Thawhtanni zing lam khan US Open mipa final khelh a ni a, inkhel hmuhnawm takah Alexander Zverev chuan set khat hloh chunga tualchhung tlangval Ben Shelton hnehin a champion. Zverev hian kum 2026 chhungin Grand Slam pahnih a la, kum a hman that ber tum a tawng mek.
US Open final-a an intum hmain Alexander Zverev leh Ben Shelton te hi vawi nga an lo inhmawchhawn tawh a, kum 29 mi Zverev hian amah aia kum ruka naupang Shelton lakah hnehna a chang fai vek. An record enin German Zverev hi champion tura rinkai ni bawk mah se Shelton hian a la hneh ngai miah loh Carlos Alcaraz hnehin semi-final a lut nawlh a, hei vang hian Shelton hian Zverev a lehthal theih beiseina sang tak a awm a. US mipuite final en turin an phur hle.
Rinlawk ang ngeiin final-ah Zverev-a’n bul a tan tha a, set khatna tir lamah break a nei nghal. Break a neih nghal mai vangin inrintawkna san zawk nen a inlan a, game thum chauh hloh chungin set a la. Awlsam taka set khatna a lak hnuin set hnihnaah tantu nei tha tak Shelton arawn khel tha chho viau a, game an inlakchhawk zak zak hnuin tie-break khelh a ngai. Tie-break-ah tawnhriat ngah zawk Zverev a chungnung leh ta viau thung a, 7-2 a chungnungin set a lak belh leh.
Set hnih a hloh zawn hnuin Ben Shelton-a’n set lak ngei tumin tan a khawh. Set thumnaah break pawimawh tak neiin a hlawhtling ta nge nge a, game nga hloh chungin set a la. Set a lak vangin champion theih beiseina nei thar bawk mah se set linaah Zverev a chungnung ta viau thung. Set linaah hian 5-1 ngawtin Zverev hian hma a hruai a, champion a hnaih tawh hle. Dinhmun chhe taka ding chungin Shelton-a’n game khat lak belh leh bawk mah se Zverev-a’n a serve a hum zui leh ta si a, champion tuma inelna a tawp. Champion tawh mah se Zverev hian a la champion lo emaw tiin game khelh chhunzawm tur emaw a la ti tehlat. A champion hun hai bawk mah se a hai rei lo. A harhchhuak thuai a, entute tan rawn Ben Shelton lakah 6-3, 7-6(2), 5-7, 6-2 a chakin US Open-ah a vawi khat nan a champion.
Olympic leh ATP Final ahte champion tawh bawk mah se Alexander Zverev hian Tennis-a inelna lian ber Grand Slam-ah champion a harsat tlat thung. Kum 2020 khan US Open-ah hian final a khel a, Dominic Thiem lakah set hnih a la hmasa a, champion a hnaih hman hle. Champion theihna hun tha nei bawk mah se uiawm takin a chhawr tangkai zo lova, a champion zo lo. Hliamin a tibuai zui a, player tha zawk Carlos Alcaraz leh Jannik Sinner te an rawn che ropui chho bawk nen Zverev hi Grand Slam-ah a champion loh mai a rinawm hman hial. Grand Slam-ah champion a harsat tlat thin laiin 2026 a lo inherchhuak a, Grand Slam pahnih ngawt a la ta a ni.
French Open-ah champion lai Carlos Alcaraz chu hliam vangin a inlan thei lova, champion tura rinkai Jannik Sinner leh Novak Djokovic te an tla hma bawk. Alcaraz, Sinner leh Djokovic te awm loh chhawr tangkaiin Zverev hi a vawi khat nan Grand Slam-ah a champion nawlh. French Open-ah a champion hnuin Wimbledon final a lut zui leh a, Jannik Sinner hneh lovin a tlawm. US Open a lo inherchhuak a, dam dup, nghet leh tlo tak sia inlanin a champion zui leh ta a, Zverev tan 2026 hi kum tha bik a ni chiang hle.
US Open-ah a champion hnuin Alexander Zverev chuan a laka rinna nghat tlattu a nu chungah lawmthu a sawi a. A nu vang liau liau a tun hun thleng a, trophy hlu tak la thei a nih thu a sawi.