Selena Gomez chuan March ni 17 khan Instagram-ah follower maktaduai 400 a nei tling ta a, hmeichhe zinga Instagram-a follower 400 nei tling thei hmasa ber leh awm chhun a ni.
Selena hian thla kalta khan Instagram-ah follower maktaduai 381 neiin, Kylie Jenner lehpelin, hmeiche zingah Instagram-a follower ngah ber a rawn ni a, tunah chuan follower maktaduai 400 a nei tling ta a, he mellung hi hmeichhe zinga thleng thei hmasa ber a ni ta a ni.
Hmeichhia chauh ni loah chuan Instagram-a follower ngah ber chu footballer Cristiano Ronaldo niin, follower maktaduai 562 a nei a, footballer bawk Lionel Messi-a’n dawtin, follower maktaduai 442 a nei ve thung.
Selena Gomez hian hmanni lawk khan a IG-ah hian makeup hmang loa a thlalak a post a, a caption-ah’Violet Chemistry’ tiin a dah a, hei hi Miley Cyrus studio album pariatna ‘Endless Summer Vacation’ a track title a ni.
Selena Gomez hian kum li chuang mah Instagram hi a chawlhsan hnuah kumin January khan a Instagram page a rawn thar thawh ve leh chauh a, social media hrim hrim chu rilru hriselna lam tibuai thei nia a ngaih avangin a phone atangin he app hi a delete daih a, tunah a rawn kir leh ta a ni.
Selena hian Instagram a chawlhsanna chhan sawiin, “Thawk khat lai kha chuan Instagram kha ka khawvel a ni tawp mai a, chu chu a hlauhawm hle a ni. Ka kum 20 hun hmasa lamah khan nalh tawk loa inngaihna ka nei a. Khatiang lai khan makeup mamawh tlata inhriatna leh makeup tel lo a midangin min hmu tur ngaihngam loh tlat lai kha ka nei a ni,” tiin InStyle-in an kawmnaah a lo sawi tawh a ni.
Selena Gomez-in IG-ah record siamin M400 follower nei tling
Get real time updates directly on you device, subscribe now.
Prev Post
Next Post