ISL champion ATK Mohun Bagan

ISL champion ATK Mohun Bagan
Inrinni khan Goa khel-mual Jawaharlal Nehru Stadium-ah Hero Indian Super League (ISL) final khelh niin, Mizo player pahnih Lalrinliana Hnamte leh Lalthathanga Khawlhring kawltu ATK Mohun Bagan (ATKMB) chuan penalty petah 4-3-a Bengaluru FC hnehin title an hlawhchhuak.
Kolkata club ATKMB leh South Indian team tha hi hun pangngaiah 2-2-a inhneh-tawkin, penalty shoot-out hmanga thelh an ngai a; penalty petah hian Mariners an vannei ta zawk a ni.
Final inhnehtawk takah hian ATKMB player Dimitri Petratos chuan penalty vawithum petin a thun vek a; chutih laiin Mohun Bagan goalkeeper Vishal Kaith chuan shoot-out lamah Bruno Ramires-a pet a dang a; a hnuah Bengaluru FC tana penchhuak Pablo Perez chuan goal kham chungah a thlawhchhuak a, Kolkata giants kuta top flight title luh ni a herchhuak ta a ni.
An thah fel hlawt tihah zawnchhuah ngai khawpin Sivasakthi Narayanan a inhliam a, Bengaluru FC coach-in a tum aia hmain veteran striker Sunil Chhetri a luhtir a ngai.
Minute 13 an khel tling tihah Petratos corner pet atanga ball chhuak a kut a khawih fuh palh avangin Krishna chuan penalty a chawi a, penalty hlawhchhuaktu Petratos hian ATKMB hmahruaina goal a chhuihlut er zawk.
ATKMB lamin nawr chhunzawm zelin, Bengaluru FC player-te an talbuai hle a, an duh anga che thei lo leh an siphurh sut mai thei lo sapatal vel hian yellow card an hmu nual a, an head coach Simon Grayson pawh a bang bik lo!
First half hun pekbelh tawp dawnah Chhetri chuan Bengaluru siphurh sutna goal a chhuihlut a, sikhat ve ve thuna inhnehtawk chungin chawlhlawk an hmang phawt.
Second half minute 78-ah striker Krishna chuan South Indian club hmahruailetna goal tilutin, chumi atanga minute nga a liam leh rualin Bengaluru FC box chhungah Perez vangin Kiyan Nassiri a tlu a, ATKMB-in a tum hnihna atan penalty an hlawh-chhuak a, Petratos bawkin goal-ah a chantir leh.
Hun pekbelh minute thumna a kal mek laiin Asish Rai-a shot chu line atangin Bengaluru FC right-back Prabir Das chuan a hnawlchhuak hman hram a; a hnu rei vak loah Colaco leh Nassiri thawkdun chuan goal an thun teuh hle a, Brazilian midfielder Bruno Ramires lo tlazepin Bagan chakna goal tur a dang hman hram a, extra time khelh an ngaih phah.
Minute 30 hun pekbelhah hian Bengaluru player pahnih Udanta Singh leh Rohit Kumar-te’n an hun tha hmuh bawhpelh ve vein goal zawnah ball an thawnlut zo lo.
ATKMB lama ‘chance’ tha hmu Rohit pawhin hnai tak atangin a thelh ve bawk.
Penalty shoot-out pumpelh theih a nih tak loh hnuah Golden Glove award dawngtu ni zui ta Kaith chu a zawna a vawihnihna atan penalty hmachhawn turin Mohun Bagan goal-ah a ding chhuak leh a, a vawikhatna atan a team chu Hero ISL title a lakpui.
Champion thar ATK Mohun Bagan hian prize money-ah cheng vaibelchhe ruk an dawng a, pahnihna Bengaluru FC kutah cheng vaibelchhe 2.5 a lut ve thung.
Mizo player pahnih
Tarlan tak angin, ATK Mohun Bagan lamah hian Mizo player pahnih awm-in, pakhat zawk Lalrinliana Hnamte hi Durtlang rawlthar kum 19 mi, (5 ft 9+1/2 in) niin, central midfield-a tlan thin a ni a; media-te tarlan danin Bagan hian cheng nuai 80-in inremna an ziahpui a, a contract neih lai hi May 31, 2024-a tawp tur a ni.
Pune City FC U-18 team lamah a youth career hmang tawhin, Hyderabad FC reserves team tana a khelh leh hnuah a senior career tan turin East Bengal a zawm a; kum 2021-2022 khan game 17 khelin goal khat a thun a; kum hnih chhung atana Bengal hmelma kumhlun Bagan a zawm hnu hian rinrawl a la ni pha chiah lo deuh.
He team-a Mizo player dang Lalthathanga Khawlhring (Puitea) pawh hi central midfielder bawk niin, kum 24 mi, feet 5 leh inchi 7-a sang, Bethlehem Veng-thlang tlangval hian a senior career-a team a vawn tawhte chu DSK Shivajians (2016-2017), NorthEast United (2017-2020), Aizawl FC (loan) (2017-2018) leh Kerala Blasters (2020-2023)-te an ni.
DSK Shivajians academy a zawm hma Bethlehem Vengthlang tana a khelh laiin Puitea hi Mizoram Premier League-ah 2015-16 season khan best midfielder-a thlan a lo ni tawh a; 2021-22 season khan Kerala Blasters FC chu Indian Super League runner up a lo nihpui tawh bawk.
Season tharah hming thar!
Indian Super League champion thar ATK Mohun Bagan chuan season thar atangin hming thar an pu tawh dawn a, Mohun Bagan Super Giants tih an ni tawh ang.
He thu hi Margao khuaa ISL final hnehna an chan hnu lawkah club neitu Sanjeev Goenka chuan puangin, an hming thar vuah hi ISL title an lak fel ruala puan an duh vanga final nghak hram hram an nih thu a sawi.
2020-21 season-ah khan ATK nen insuihfinin Mohun Bagan chuan Indian top flight ni ta ISL a khel tan a; ATK Mohun Bagan tih hming an put zet hnuah season thar atangin hming thar an pu leh dawn ta a ni.