‘Sengol’ an sawi danah finfiahna awm lo ti

Congress leader Jairam Ramesh chuan Mord Mounbatten, C Rajagopalachari leh Jawaharlal Nehru ten ‘Sengol’ chu British tena India hnena thuneihna hlanchhawn tir chhinchhiah nan an hmang tih document emaw finfiah a awm lo tiin a sawi.
Hei bakah hian Ramesh chuan Prime Minister Narendra Modi leh a drum-beaters te chuan parliament hawnna neih tur inkhawm chu Tamil Nadu a an politics hlawchhamna thawidam tum nana hman tum tiin a sawi bawk.
‘Sengol’ hi Lok Sabha speaker chair bul lawkah dah a ni dawn a, Parliament building thar chu May 28 ah PM Modi-a’n a hawng dawn a, opposition party 20 te chuan an boycott dawn thung.
May 25 khan BJP te chuan Congress te chuan Hondu tradition mausamin ‘Sengol’ sacred tak India prime minister hmasa ber Nehru hnena pek chu museum-a dah mai mai tiin an sawi a.
Nehru hnena “sacred” ‘Sengol’ India Independence day dawn zana hlan chu British tena India hnena thuneihna an hlanchhawnna chhinchhiahna pawimawh a ni, tiin BJP leader Amit Malviya chuan a sawi a.
Congress leader Ramesh thung chuan, “He lal tiang hi PM Modi leh a drum-beaters te chuan Tamil Nadu a an politics hlawhchham thawi dam nana an hman a ni. Zawhna pawimawh ber zawk chu eng vangin nge Parliament building thar chu President Droupadi Murmu an hawntir loh tih a ni zawk,” tiin a sawi a.
Ramesh chuan lal tiang Sengol chu Madras-a religious establishment tena an ruahman niin Madras city (tuna Chennai) a siam a ni a, Nehru hnenah August 1947 khan pek ngei chu a ni a ti a.
“Mounbatten, Rajaji leh Nehru ten he Sengol hi British tena India a thuneihna an hlan chhinchhiahna anga sawina engmah finfiahna emaw a awm lo. Tuna an sawi vel dan hi chu thutak awm hauh lo a ni,” tiin a sawi a.
“Mi tlemte ten an phuahchawp niin chu chu WhatsApp-ah an thehdarh a, tunah PM Modi drum-beaters te chuan media ah an thehdarh ta vak a ni. Rajaji scholars mithiam tak tak pahnih te chuan engmah thutak awm lo an ti a ni,” tiin Congress general secretary communication chuan a sawi.
“Parliament building thar chungchang hi WhatsApp university atanga dawt nena bawl phawn hi thil mak a ni lo. BJP-RSS distorian te chuan finfiahna awm mumal si lovin zau takin chet an la leh a ni,” tiin Ramesh chuan a sawi bawk.