Senior journalist, Aizawl Observer editor E Lalhleia (85) chu 2023 May 23 chawhnu dar 2.53 khan taksa lam bawrhsawmna hrang hrang avangin a thi a, May 24 khan an chenna Maubawk Aizawlah vui a ni.
Chanchinbu khawvel a luhchilh hma, Mizoram buai lai khan E Lalhleia hian kum 1966 khan MNF ramhnuai sawrkar a zawm a. Supply leh Communication Officer a ni thin. Pathian thua tui tak a ni a, ramhnuaia an awm lai pawh hian Pathian thu hrilh leh sawi tuipui tlattu niin, MNF ramhnuai sawrkarah khan Brigade leh Battalion Hqrs-ah Pathian thu a sawi kim vek nia sawi a ni. A hming bulah ‘Evan’ a dah ta nghe nghe a, ‘Evan’/E hi a hming bulah a dah zui ta zel a ni.
Ram tana zalenna sual lai hian Lengte daiah India sipai nen an inkahnaah a tel a, a malpuiah hliam a tuar a, Civil Hospital Aizawlah zai tura hruai niin, Bazar Bungkawnah sipai an lo awm avangin a inthiarfihlim a, an kaltlang ngam ta lo a. Rei tak hliam a tawrh hnuah Bangladesh-ah chhukin a taksaa silaimu tang chu lak chhuah a ni chauh a ni.
Chanchinbu lama a luh hnu, kum 1995 kumtirah Mizoram Joursnlists’ Association (MJA) a zawm a, a luh tirh hian Aizawl Observer chanchinbu Weekly-ah telin a hnuah an chanchinbu hi nitin chanchinbuah a let a, a thih thlengin he chanchuinbu hi a enkawl a ni.
A nupui H Lalnunmawii nen fa pali an nei a, a fate pahnih hian chatuan ram an pansan tawh. Kum 2012 atang khan taksa bawrhsawmna in a tlakbuak nasa tan a, lung tha lo avangin hun rei tak a buai hnu ah tunhnaia natna dang a kai tel avangin a chak loh a zual a, May 23 khan a lei taksa chu a chawl
Senior journalist E Lalhleia thi
Get real time updates directly on you device, subscribe now.
Next Post