September chhunga SEDP 2nd phase sem zawh tum

Family oriented SEDP thawh hnihna chu September thla chhungin sem zawh hman an tum tih deputy chief minister Tawnluia chuan a sawi.
Zirtawpnia Khawzawla District Research Office building thar a hawnnaah deputy chief minister chuan mipuiin anmahni kutkawih ngeia intodelhna kawng an zawh theihna tur sawrkar flagship program ‘SEDP’ pawh hrilengin tikhaihlak mah se, 1st phase-ah mi 60000 tuam tawh niin, 2nd phase-ah mi 60000 bawk tuam tum a ni, tiin, “September thla chhung hian sem chhuah hman tum a ni,” a ti.
“Mizoram sawrkarin mitin huapzo hmasawnna kalpui a, retheite khaichhuah hi a ngaipawimawh hle a. Hrileng kara sawrkar hmalakna ten rah tha a chhuah chho mek tih hriat hi a lawmawm hle a ni,” a ti.
Tuichang bialtu MLA ni bawk Tawnluia chuan District Research Office hmun tur ngaihtuahtu Khawzawl Arro Veng khawtlang chungah lawmthu a sawi a ni.
Khawzawl DRO hi 2022 September 12 khan sak tan a ni a, kumin May 12 khan sak zawh a ni. Building hi cheng nuai 43 senga sak niin, chhawng hniha sang a ni.