Serchhip Hospital sak hna tan

Cheng nuai 8692.39 senga Serchhip District Hospital thar sak tur chu Thawhlehni khan hna tan a ni.
Serchhip District Hospital thar sakna atan hian Power Grid Corporation of India Limited (PGCIL) atangin Serchhip bawrhsap kalta pahnih – Abishek Kumar leh Nazuk Kumar IAS ten corporate social responsibilty fund vaibelchhe 21 an dilchhuah sak a; thudawn danin Serchhip bialtu MLA, chief minister Pu Lalduhoma’n nuai 6845.39 a ngaihtuah belh sak dawn a ni.
Hospital sa tur contractor atan Zamzo Engineering Construction & Consultancy firm thlan a ni a, kum thum chhunga sak zawh an tum dawn a ni.
Thawhlehnia a sak hna tannaah Zamzo Engineering Construction & Consultancy proprietor Rony Zolianngura chuan Serchhip-in hospital tha leh changtlung tak a neih theih nan drawing ang thlapin, Zoram pum huap pawha hospital chhuanawm tak ni tura sak an tum tih a sawi a. Hospital sak chungchang buaipui tura din Joint Action Committee chairman Kapliana Pachuau pawhin, hospital hmunhma hi Pathianin Pastor Chhawna hnena inlarna kaltlanga a pek a nih avangin Serchhip mipuiin an ngaihlu em em a, PGCIL-in sum a pek let thum aia tam ngaihtuah belhsaktu chief minister chungah lawmthu an sawi tih a sawi. Chief minister ngenna leh duhdan angin JAC hian hospital sak hna hi an vil zui reng dawn tih a sawi bawk.
Serchhip JAC ngenna angin, Hospital hnuaiah Ramthlun kawng rualin public parking atan laih a ni dawn a; parking hi chhawng thum awmin mipui tan chhawng hnih ruahman a ni anga, car 72 leh two wheeler 100 a leng ang. Parking chhawng chung ber chu hospital thawktute leh ambulance te, damlo hruaitu lirtheite tan ruahman a ni.