Kawng chhia avangin raipuar leh damlo phurh that ngam loh – Congress

Aizawl khawpui chhungah kawng chhia vangin emergency chuan raipuar leh damlo phurh that ngam an ni tawh loa, a rang thei ang bera siamtha turin sawrkar an phut tih Congress party chuan an sawi.
MPCC thuchhuak chuan, chief minister Pu Lalduhoma hian ZPM a sawrkar chuan kawng tlo lo hi a tlo nghal vek dawn, tiin vawi tam campaign-naah a sawi thin tih a sawi a. Party dangten sawrkarna an chan laiin, a bikin Aizawl khawpui chhunga kawngpui a chhe ngai loa, tunah chuan raipuar leh damlo, emergency-a phurh ngam an ni tawh lo chu sawrkar inthlah dah vang a ni tih a sawi.
‘ZPM a sawrkar hnuah thal laia inbuatsaihna hun zau tak a awm chunga kawngpui thawmthat hna an thawk lo leh an thawmthat thenkhat pawh a beitham lutuk hi Congress party chuan mak a tiin PWD minister a dem takzet a ni,’ a ti.
Mizoram hmun hrang hrangah kawng chhe lutuk vangin mipui châk laknaah harsat nasa tak a awm mek tih Congress party hian sawiin, ei leh bar chawkluhna ber Silchar – Aizawl road pawh bungraw phur lirthei an rawn kal duh tawh loang, tih hlauhawm khawpin a chhia a. Khaw tam takah maxi cab ho kawngpui a chhiat avanga an service duh lo leh kawng a chhiat avanga school naupangten kawng an zawh hial chu sawrkar mualphona a ni tih hre nawn a. A rang thei ang bera hma la turin PWD minister an phut tih a sawi.
‘Chhuanlam tur zawng ringawt a, insawifiah reng ringawt loin, hna tak tak thawk tan tawh turin kan duh a ni,’ a ti.