Serchhipah Champhai district atanga vawk lakluh khap rih

Champhai district hmun thenkhatah vawk natna African Swine Fever (ASF) a len mek avang leh Serchhip khaw chhungah ran natna – Porcine Reproductive & Respiratory Syndrome (PRRS) nia rinhlelh vawk damlo a awm mek avangin, Serchhip district magistrate chuan ran vulh a himna atan ram dang atangin leh Champhai district atangin vawk leh vawksa atanga thil siamte lakluh a khap.
‘Serchhip district-ah ram dang (foreign countries) atanga vawk, vawksa leh vawksa atanga siam ei tur lakluh khap a ni a. ASF hri lenna – Champhai district atangin vawk, vawksa leh vawksa atanga siam ei tur lakluh khap a ni,’ a ti.
State pawn atanga vawk lalut turte chuan Agricultural and Processed Food Product Export Development Authority approved firm atang chauha lakluh theih a nih bakah AH & Vety director atangin phalna lak hmasak tur a ni tih a sawi a. Serchhip town area atangin vawk, vawksa leh vawksa atanga siam ei tur thawnchhuah khap a ni tih a sawi bawk.
Vawk hrisel tha chauh talh tur leh vawk damlo reng reng talh tura sawngbawl lo tur te, vawk damlo leh thi chu AH & Vety department thawktute hnenah hriattir thuai tur te, vawk thi reng reng thuk taka phum bo tur te, vawk in leh a vel disinfectant (bleaching, chinai, sodium hypochloride) hmanga tifai thin tur leh ran in intlawhpawh tawn lo turin a ti.
He thupek hian thu leh awm hma chu order chhuah atanga thla hnih a huam dawn a. Thupek zawm lo chu section 188 IPC dan hmangin hrem theih a ni tih a sawi.