Sericulture hnuaia hmalakna en

Sericulture hnuaia hmalakna en
Sericulture minister Er. Lalrinawma chuan Nilaini khan Chawilung leh Baktawng khuaa Sericulture department hmalakna leh hmachhawp a hmunah a enfiah.
Kan ram leh hnam a lo ngheh deuh deuh theihna’n eizawnna kawngah hma kan sawn zel a tul a, kan intodelh loh chuan kan zahawmna pawhin a tuar thei, tih Er Lalrinawma hian a sawi.
Pangang khawi chu khawvel hmun dangah leh India ramah ngei pawh market a tha a, kan dinhmun chawikanna atan leh intodelhna atan rinthlak hle tih sawiin, Mizoramah eizawnna atana hmangtu kan tam chhoh zel a beisei awm hle a, department pawhin theihtawp chhuahin hma a la zel tih a sawi a ni.
“Khawvel sik leh sa enin ramngaw leh tuihnate tichereu lutuk loa eizawnna kan thlan thiam a tul zel a, chumi atan chuan sericulture lam hi a tha hle a, tih tak takna nena beitute tan chuan hlawhtlinna a awm zel ang,” Sericulture minister hian a ti a. Pangang khawituten hma an sawn zel theihna’na department inpekna fakawm a tih thu a sawi.
Chawilung khuaah hian self help group anga hma lak niin, chhungkaw 25-in pangang khawi hi bul an tan tawh a. Baktawngah chhungkaw 24-in kumin hian bul an tan thar ve dawn a ni. Department thawktuten an hriat duhte hrilhin, a hmunah inzirtir nghal a ni.