Sevilla goalkeeper-in khelmualah beih a tawk

Sevilla goalkeeper-in khelmualah beih a tawk
Ningani zan Europa League knockout round play-offs second leg inkhel pakhata PSV Eindhoven-in sihnih faia an mikhual Sevilla an hneh tumin mikhual goal-veng Marko Dmitrovic chu khelmual chhunga tlanlut fan pakhatin tharum hmangin a bei a, an inchai hman hlek hnuah khelmual vengtute’n fan tlanlut hi an hnukchhuak.
Europa League knockout round play-off first leg lama sithum faia tlawm PSV hian an tum angin goal an thun lawk thei lo a, hun tawp dawnah Luuk de Jong leh Fabio Silva-te’n mualneitu team tan goal khat ve ve tilut bawk mah se Dutch team tan he goal hnih hi round of 16 lut chho turin a tawk zo lo a, goal dang chhuah belh duh lo Serbian keeper Dmitrovic chuan khelmual chhungah ngei beih a tawk ta hial a ni!
Manchester United striker hlui Ruud van Nistelrooy-a team PSV hian an goal thumna an tihluh zawh tak ngang loh avangin 3-2 aggregate-in Spanish club an tlang a, khelmual chhungah thil hmuhnawm loh tak a thleng zui ta a ni.
Kum 31 mi Dmitrovic hi pitch invader chuan hun tawp dawnah khelmuala tlanlutin a pan ding a fan tlanlut hian a kuttum pawh a len hman a, mahse, an han inchai det hnuah Serbian keeper hian khelmualah a bawhtlu thei a, khelmual duty-te’n rawn pui vatin, pawn lam thimah an hnukchhuak!
Charlton Athletic goalkeeper hlui Dmitrovic hian a hnuah a thil tawn sawiin, “Khati ang kha football-a thil thleng atan chuan a mawi ngai lo a, thleng lo tawp tur niin, tun atang chuan an phu tawk hremna an pek ngei ka beisei,” tiin.
Serbia international chuan amah bawrtu reporter-te bulah sawizawmin, “A lo lang thut a, hnung lam atangin mi rawn nam a, kan result avanga thinrim pawh a ni mai thei a, mi khawih kha a rawn tum a, ka lo manbet theih hlauh a, security duty-te lo lan hun ka nghak ta a ni,” a ti.
Sevilla boss Jorge Sampaoli pawhin an keeper chunga thil thleng kha a lungchhiatthlak tih sawi chungin tihtawp vat chi nia a ngaih thu a tarlang tel.