Sevilla in United an sawp

April 20, Ningani zan khan UEFA Europa League quarter-final khelh zawh a ni a. Europa League-a hnuhma nei tha ber Sevilla chuan Manchester United chu si thum fai ngawtin an sawp a, phu takin semi-final an lut. Sevilla bakah hian Italian club lian pahnih Juventus leh AS Roma ten semi-final an lut ve bawk.
United vanduai a kal tluang
Premier League club lian Manchester United hi quarter-final thawh khatna leh thawh hnihnaa La Liga club Sevilla an hmachhawn tumin an chechhe hran lova, an vanduai a kal tluan em vangin tlawm zawkah an tang a, an tla a tih theih. United manager Erik ten Hag pawhin tihsual nei zul chung chuan char a harsa thin tih a sawi ve bawk. United hian Old Trafford-ah si hnih faia hma an hruaina chu hun tawp dawna own-goal pahnih vangin an hum zo lova. Sevilla muala an len luh tum pawhin Harry Maguire leh si nghak David de Gea tihsual ho tak vangin goal hnih an chhuah zui leh bawk. Hengte vang hian United vanduai a kal tluang a tih loh theih loh.
Europa League-a champion ngun ber Sevilla in Ramón Sánchez-Pizjuán-a an mikhual United hneh ngei tumin an nawr a. Minute riatna lekah goal an thun nghal. Si nghak David de Gea chuan defender Harry Maguire ball a pe a. Maguire hian ho takin Sevilla player a pet per ringawt a, Sevilla hian rang takin an mikhualte an nawr tlang nghal a. Minute 8-naah Youssef En-Nesyri chuan awlsam taka pet goal in hmahruaina goal a thun.
Hma takah goal an chhuah vangin United in an si phurh sut ngei tumin tan an khawh a. Hun tha nei zauh mah se an chhawr tangkai zo lo. Chawlhlawk hmain goal dang a luh belh thei lova, United hian si khat faia hnufual chungin chawlhlawk an hmang.
Chawlhlawk hnu lamah Sevilla an khel tha leh zual a, goal an thun hma hle. Second half tan atanga minute hnihna lekah Loïc Badé chuan fuh zeta pet goal in an goal hnihna a thun a. An mualah ngei si hnih faia hma an hruai tawh vangin Sevilla hian semi-final an hnaih tawh hle.
Erik ten Hag-a team United in inlehthalna lian thlentir tumin tan khawh bawk mah se hun tawp dawnah ho taka chesualin goal an chhuah belh leh ta zawk. Si nghak David de Gea chuan box pawnah ho zetin ball a dang sual a. A ball dan per hi minute 81-naah awlsam zetin goal ruakah a thun a, an chakna a nemnghet leh zual. Tichuan, goal dang luh belh lovin hun a tawp a. Sevilla chuan si belhkhawmah 5-2 ngawta Manchester United hnehin Europa League semi-final an lut.
Premier League club lian Manchester United hian La Liga club Sevilla hi an ngam hleithei meuh lo. An intum hnuhnung vawi nga ngawtah United hian Sevilla an hneh thei miah lova, Europa League-a champion an tumna kawng daltu pawh Sevilla bawk hi an ni zui leh ta a ni. Red Devils hian Pathianni zan hian FA Cup semi-final an khel zui leh dawn a. Wembley Stadium-ah Brighton an hmachhawn dawn. United manager Erik ten Hag chuan FA Cup final luh ngei an tum thu a sawi a. FA Cup-ah champion pawh nise Sevilla an hneh loh vangin Trophy lian pathum lak kawp an tumna erawh a tlawlh fel ta thung a ni.
Roma in Feyenoord an lehthal
Europa League quarter-final dangah AS Roma chuan Mimuala an hneh loh Feyenoord Rotterdam chu an mualah 4-1 in an lo hneh a, semi-final an lut.
Mourinho enkawl Roma tan si khat phur sa chunga an hmachhawn Feyenoord lakah an chak zo lo teuh hle a. Hun tawp dawn hnaiah Dybala goal ropui hmanga an si phurh sut zo hramin, Extratime-a goal hnih an thun an chakpui thei tawk.
Roma tan hian Leonardo Spinazzola chuan minute 60-naah hmahruaina goal a thun a, an si phurh a sut zo phawt. Si belhkhawmah 1-1 a nih laiin eyenoord in goal an thun hmasa leh a, minute 80-naah Igor Paixão goal hmangin Roma dinhmun a derthawng thar leh. An mualah tlawm thei dinhmunah an din nawn leh hnuin Roma in goal thun ngei tumin thapui an thawh a. Minute 89-naah Paulo Dybala goal ropui hmangin an si phurh an sut ta nge nge.
Hun pangngai tawp thlenga goal dang a luh belh theih loh hnuin minute 30 dang khelh belh leh a ni a. Mualneitu Roma chu tlo zawkah tangin goal hnih an thun belh. Minute 101-naah Stephan El Shaarawy chuan hma an hruai letna goal a thun a. Minute 109-naah Lorenzo Pellegrini chuan an chakna nemnghet turin an goal lina a thun zui leh bawk. Hun tawp thlengin goal dang a luh belh tawh lova, Roma chuan 4-2 a Feyenoord Rotterdam lehthalin semi-final an lut ta a ni.
Juventus leh Leverkusen an tlang
Europa League quarter-final dangah Italian club lian Juventus leh German club Bayer Leverkusen te ten an khingpui ve ve hnehin semi-final an lut bawk.
Serie A club lian Juventus hian an mualah si khat faia an hneh tawh Sporting Lisbon chu Estádio José Alvalade, Lisbon-ah 1-1 in an inhnehtawkpui a. Si belhkhawmah 2-1 in an chak a, Sevilla hmachhawn turin semi-final an lut.
Si khat faia hmahruai tawh Juventus hian Mimualah bul an tan tha viau a, minute 9-na lekah midfielder Adrien Rabiot chuan hmahruaina goal a thun. Si hnih faia hma an hruai tawh vangin an dinhmun a tha viau tawh. Dinhmun chhe takah ding mahse Lisbon in beisena thar an neih theih nan penalty an hmu. Penalty hi minute 20-naah Marcus Edwards-a’n pet goal in an si phurh a sut a. Hun tawp thlenga goal dang an thun belh theih loh vangin Lisbos hi semi-final lut zo lovin an tla zui ta a ni.
Ninga zana inkhel dangah Bayer Leverkusen chuan an mualah 1-1 a an inhnehtawkpui tawh Union St.-Gilloise chu Lotto Park, Brussels-ah 4-1 ngawtin an hneh a, femi-final an lut.
Europa League semi-final hi May ni 12 leh ni 19-ah khelh a ni dawn a. Juventus leh Sevilla an intum ang a. AS Roma leh Leverkusen an inhmachhawn ve bawk a. Champions League-ah Italian club an chetha a. Europa League-ah pawh Serie A club pahnih final lut thei dinhmunah an ding bawk a. Europe lamah an chetha hlawm hle.