Shah Rukh Khan chu lemchan lamah a thawm a reh deuh vang vang a, tunah a channa thar ‘Pathaan’ an tlangzarh a, a ni khatnaah khawvel huapa cinema hall ticket hralhna atangin cheng vaibelchhe 106 a lalut thei a, Bollywood film zingah ni khatna sum lalut hnem ber record a siam. He film-ah hian Deepika Padukone leh John Abraham te nen an chang ho a, a film hi January ni 25 khan cinema hall-ah chhuah tan a ni.
-- Advertisement --
He film hian a nikhatnaah India bikah cheng vaibelchhe 57 a lalut thei a, Shah Rukh Khan channa film-ah ni khatnaa India-a sum lalut hnem ber a ni a, ram pawna a lakluh nen cheng vaibelchhe 106 hi a tlin bawk a, Hindi film-ah ni khatnaa sum lalut hnem ber a ni bawk.
Pathaan hi Republic Day, January ni 26-ah a la chetha hle a, cinema hall ticket hralhna atangin cheng vaibelchhe 70 a lalut leh thei a, hei hi Hindi film tan record a ni a, tihian ni hnih chhungin India bikah cheng vaibelchhe 127 a lalut thei tihna a ni a, Hindi film-ah chuan India-a ni hnih chhunga cinema hall ticket hralhna atanga sum lalut hnem ber record a ni leh bawk.
He film hian ngaihven a hlawh hle a, BookMyShow ringawt pawhin ticket maktaduai an hralh tling a, INOX cinema-ah pawh ticket 2,75,000 chuang an hralh thei bawk.
Pathaan hi action film niin, Siddarth Anand direct a ni a, Sah Rukh Khan hi a changutpa niin, John Abraham hi misual lemah a chang ve thung a, Deepika Padukone bakah Dimple Kapadia leh Ashutosh Rana te pawh an inlan. A film-ah hian SRK leh Deepika te chu spy agent lemah an chang a, Salman Khan pawh a inlan ve zuai bawk.