Airtel-in Mizorama hmalakna liantham a neih mek, an harsatna leh hmachhawp neihte sawipuiin larsap Hari Babu Kambhampati chuan Bharti Airtel Limited-a zonal officer leh engineer-te chu Zirtawpni khan Raj Bhavan-ah a kawm.
-- Advertisement --
Larsap chuan Mizoramah Airtel hmalakna a tha thawkhat nia a hriat thu a sawi a. 5G network pawh hlawhtling taka kalpui tura duhsakna hlanin, internet network chak zawk hian education, health leh banking-ah hmasawnna a thlen ngei dawn tih a sawi. Aizawl leh Lunglei bakah district capital leh thingtlang khawlian deuhah te 5G network leh fiber network siam belh zel turin Airtel hotute a chah a. Thingtlang leh hmun kilkhawrah network connectivity a chhiat avanga bank service tha thei lo chu customer-ten harsatna an tawk, tiin, hei hi telecom service provider-ten an ngaihven thuai a tul tih a sawi a ni.
Mizorama Airtel hotute hian powerpoint presentation hmangin hmalakna pawimawh zual, an inzarpharh dan, tower bun zat leh hmachhawp an sawifiah a. Tunhnaia an hmalakna lianber chu India hmarchhak biala a palina ni turin internet pekchhuahna network chak ber chi – 5G network chu February 2023-a hman theih turin an inpuahchah mek tih sawiin, Aizawl leh Lungleiah hman tan a ni dawn a ni.
Aizawl hmun lun lai, pawimawh lai leh sumdawnna hmunah tower 53 leh hetiang bawkin Lungleiah tower 10 bun hmasak a ni dawn a. April 2023 thla chhungin district headquarter zawng zawngah 5G service pek hman an inbeisei tih an sawi. Thingtlang lamah pawh internet chak zawka pe chhuak turin fibre an thlun belh dawn tih an sawi bawk.
Harsatna an tawh thin, tower bunna chungchangah mipui inzirtir kan la ngai tih Airtel hotute hian sawiin, veng thenkhatah chuan tower bun hlau leh duh loh avangin network a awm lo tan tawh tih an sawi a. Thingtlang lamah erawh village council-te thlawpna tha tak an dawn thin avangin lawmawm an tih thu an sawi a ni.