Shakira-i’n Billboard Global Touring Icon Award a dawng

Shakira-i’n Billboard Global Touring Icon Award a dawng
Las Mujeres Ya No Lloran World Tour a neih mek chu Latin hmeichhe zaithiam tour a sum chevel tam berna a ni a, Shakira chu Billboard-in Global Touring Icon Award an hlan. He award hi 2025 Billboard Live Music Summit, November ni 3-ah an hlan a, Global Touring Icon Award bik hi an vawi khat sem chhuahna a ni.
A tour director Marty Hom chuan, “I tour manager rei tak ka lo ni tawh bawk a, annual Billboard Global Tour Icon Award hmasa ber hi chhuang takin ka hlan a che. I fan-ten show hmuhnawm leh nuam tak an chhim theih nana nitin i thawhrimna hmuhpuitu che kan ni,” a ti. Marty Hom hi Fleetwood Mac, Barbra Streisand leh The Rolling Stones te tana thawk mek a ni bawk.
Shakira hian he award hi Cali, Colombia-a show a neihnaah backstage-a a awm laiin a dawng tih a hria a, backstage-ah hian award hi Marty Hom hian a hlan nghal a ni. Shakira chuan a award dawn hi a dancer, band leh crew zawng zawng tan a hlan nghal a, “Keimah ang thoa thawkrim an ni,” a ti.
Shakira tour hi Live Nation produce niin, ni 82 tour a neih turah a show hmasa 64-ah ticket maktaduai 2.5 hralh tawhin, dollar maktaduai 327.4 a tling khawm hman tawh niin Billboard Boxscore chuan an tarlang a, Las Mujeres Ya No Lloran hi Latin hmeichhe zaithiam tour a sum chevel tam berna ni der tawh a, Latin mipa lama pawh Luis Miguel-a 2023-2024 tour a dollar maktaduai 409.5 an hmuh theih chiah a pha lo a, Shakira hian show vawi 14 a la nei leh dawn a, Miguel pawh hi a la khum thei maiin a rinawm.