SHC inthlan atan candidate puang

Kumin November 5-a Sinlung Hills Council inthlan turah Congress party chuan Thawhlehni khan an candidate an puang a. Bial 12 awmah an chuh kim vek dawn a ni.
Candidate puangtu MPCC president Lal Thanzara chuan, Congress party chu remna leh muanna duhtu a ni a. Tunhma khan unau hmelhai hunlai a awm a, Congress party-in a ze ngai a chhuah a, an sawrkar laiin an hotute leh HPC(D) an inbia a, HPC(D) chuan kum 2008 khan silai an tung ta a, remna leh muanna kan nei ta a. Vawiinah chuan Sinlung Hills Council kan lo nei ta tih a sawi a ni.
“Helai biala remna leh muanna kan nei hi Congress hmalakna vang a ni tih min lo hriatsak a, kan candidate-te min vote sak turin kan ngen che a ni,” a ti.
SHC inthlanah an party-in sawrkarna a siam a nih chuan, Council chhung ngei, Sakawrdaiah office neiin hna a thawk dawn tih a sawi bakah Mauchar leh Saipum inkar a fur a thala lirthei a kal theihna turin hma lak a ni dawn tih Congress hruaitu hian a sawi bawk.
“MNF president hi president-a an hman chhung leh, ZPM sawrkara chief minister hi ZPM hian an chief minister atan an pawm chhung chu Congress party tan kawl a eng zel dawn a ni,” Lal Thanzara hian a ti.
SHC-a Congress candidate leh an dinna tur bial:

8 Khawlian – Lalrawngbawla
8 Phuaibuang – Lallianzama
8 Suangpuilawn – M Dawngliana
8 Vanbawng – Lalfakawma
8 Ratu – Lalthlamuana
8 New Vervek – PC Vanlalthlana
8 Sakawrdai South – Lalrokima
8 Sakawrdai North – HC Lalthanglura
8 Zohmun – Upa Biakchungnunga
8 Tinghmun – Upa Lalzoliana
8 Saipum – Lalmuanpuia Ngurte
8 Saiphai – Lalthlirlien Hmar