Siaha-ah fai lawmman lak lawm

Siaha-ah fai lawmman lak lawm
UD&PA department buatsaih Mizoram Cleanliness Competition-a district headquarters category-a pahnihna Siaha chuan Nilaini khan an lawm.
Hmanpuitu Mara Autonomous District Council chief executive member M Laikaw chuan kum 2023-ah Mizoram khawpui fai inelnaa pathumna an nih hnuah, kum 2024-a pahnihna an ni chu hmasawnna ropui tak a ni, tiin, pakhatna an lak theih ngei a beisei tih a sawi. Siaha faina kawnga thawhhlawk tak kawngpui phiatfaitute (sweeper) inpekna leh thahnemngaihna fakawm a tih thu a sawi bawk.
Fai intihsiaka pahnihna an la thei chu state sawrkar leh District Council thawhhona that zia a langchiang tih CEM hian a sawi a. Department hrang hrang thawhhona tha nei zel turin a sawm. Khawpui a fai lehzualna turin faina chu sawrkar kuta dah mai loin, mahni mawhphurhnaa dah a ngai tih tih a sawi a ni.
District bawrhsap VL Hruaizela Khiangte chuan state sawrkar leh MADC bakah VC, NGO leh mimal tin thawhhona zara khawpui fai inelnaa pahnihna an ni thei chu lawmawm a tih thu a sawi a. UD&PA buatsaih inelnaa tehfung hrang hrang awmah an chakna leh chaklohna hrechiang a, hmasawnna atan hman thiam a pawimawh tih a sawi a ni.