Siaha-ah Kuthnathawktute Kut

All Mizoram Farmers Union Siaha District bultumin Inrinni khan Kuthnathawktute tan a vawikhatna atan District Playground Siaha Vaihpi (Vengpui) ah District Farmers’ Kut hman a ni.
Kut hmanpuitu Mara Autonomous District Council chairman N Viakhu chuan khawvela ram hmasawn leh ram ropui takte chu kuthnathawka mahni intodelh mi, mahni siamchhuah ngaisang mi leh an ram atanga thil siamchhuak leh tharchhuak hnem ber an ni, tiin, chutiang bawkin Siaha district-ah pawh hei aia nasa hian kuthna thawka an tharchhuah chu ram pawn thlenga thawnchhuak thei turin sawrkar a inhawng reng tih a sawi a ni.
He Kut hman avang hian Siaha khawpui chhung bazar dang zawng khar niin, Siaha Vaihpi District Playground-ah thlai leh thei, sa chi hrang hrang phochhuah a ni a; KVK phochhuah thlai chi lei theihin a awm bawk. An district chhunga kuthnathawktute bakah sawrkar department hrang hrang kutchhuak lei tur a awm a, bawng ek lei tha thlengin lei theiha phochhuah a ni.