Siaha district-a VC inthlan Seat 492 inchuh tur mi 1250

Siaha district-a VC inthlan
Seat 492 inchuh tur mi 1250
April 18 hian Siaha district-ah village council inthlanpui neih a ni dawn a. VC 99 awmah political party 4 hming leh independent-a ding 1250 an awm.
VC inthlan turah hian general seat 393 leh hmeichhia tana reserved seat 99, a vaiin 492 a awm a; nominated seat 99 awm bawkin, a vaiin seat 591 a awm. Candidate 1250 an awm a, general seat-ah 1011 leh reserved seat-ah 239 an awm dawn a ni.
Party malah BJP chu candidate ngah ber niin 454 an nei a, MNF-in dawtin 402 an nei. INC-in 261, ZPM 84 awmin, independent-a ding 49 an awm a ni.
Inthlanna turah hian voter 43120 an awm a, mipa 20794 leh hmeichhia 22326 an ni.
Voter tamna ber New Siaha West-I VC ah voter 1184 an awm a, a tlemna ber Supha VC-ah voter 68 an awm. Voter 100 aia tlem awmna hi Supha nen hian a dang pahnih – Riasika (96) leh Miepu (99) an ni.
Candidate nih tum nomination paper hnukkir leh mi 8 an awm a, pakhat chu scrutiny paltlang loin hnawl a ni. Meisatla-I VC chu candidate tamna ber niin 25 an awm a; Riasika leh Ahmypi ah candidate 5 ve ve awmin a tlemna ber an ni.
District election officer, bawrhsap Lalhmunsanga Hnamte chuan Ningani khan Siaha-ah thuthar thehdarhtute kawmin VC inthlan neih tura inbuatsaihna leh hriat tur tul dangte a sawi. Siaha SP VL Lura Hauzel sawi danin, voters 800 aia tam awmna VC 9-ah duty an indah dawn a, a tulna apianga rang taka tlankual tur Quick Reaction Team 5 din niin, Tipa, Phura, Lobo leh Siaha ah dah an ni ang. Election duty turin 3rd IR Bn atangin security personnel 26 an kal dawn a. Boruak muanawm tak hnuaia inthlan neih theihna’n, Siaha district-a lirthei lut te chu Kaochao, Lobô, Noaotlah, Tipi Ferry-ah te surprise check an nei thut thut thin dawn tih a sawi lawk a ni.