Siaha District-ah BJP an thang em?

April ni 18 khan Mara Autonomous District Council (MADC)
huam chhungah VC an inthlang a, BJP an sang ber. A sang ber BJP hi Siaha district-ah an thang tihna a ni em tih thu-ah ngaihdan a inang lo thei ang.
Mizoram hmun danga thang hlei thei lo BJP hi MADC-ah an sorkar mek a, VC inthlanah an sang ber bawk. Hei hi Mizoram politics-ah chanchin thar a tling a, MLA inthlan lo awm tur thlir nan pawh a hman loh theih loh ang.
Siaha atanga thu dawn danin, a sang ber BJP hi a che tha berah an ngaih theih rualin, MADC-a sorkarna changtu ni chunga an dinhmun atan chuan a sang lua lo tih ngaihdan a awm bawk.
“VC inthlanah chuan MADC-a sorkarna changtu party hian an hui deuh duak thin a, BJP pawh hi MADC-a member an neih zat atanga chhut chuan 90% te la pha hial tura ngaih an ni. Chumi atanga chhut chuan VC an la hnem tawk lo tiin a sawi theih,” Siaha-a politician pakhat chuan a ti.
MADC-ah BJP hian member 16 an nei; inthlanah 12 an tling a, nikum December-a sorkarna paihtu MNF member palite’n an zawm hnuah 16 an tling ta. MNF-in panga an nei a, Congress-in pali an nei.
Tun tum VC inthlanah BJP hian VC 41 an la a, MNF-in 25, Congress-in pariat, ZPM-in pahnih an la a ni.
Minister of state atanga chawlhtir Dr K Beichhua zuitu, MNF atanga chhuakte’n tun hnaiah BJP an zawm bawk a, MNF atanga chhuak an tam viau a niha, BJP an lian sa viau a nih bawk chuan, BJP hian VC tam zawk an la ang tih ngaihdan a awm.
Siaha district-ah hian BJP hi lian thut an ni a, 2017 inthlana tling Congress MDC 17-in an zawm bakah MDF (Mara Democratic Front) MDC pahnihin an zawm bawk. Congress atanga zawmtute hi Congress mi pawimawh tak tak an ni. 2022-ah an inthlang leh a, member pakaw nei MNF leh member pali nei Congress tang dun an sorkar. MNF member palite leh BJP member te’n nikum kum tawp lamah chu sorkar chu an nam tlu a, member 12 nei BJP leh MNF atanga zawmtute an sorkar ta a ni.
“Congress tan lawmna tur a awm a, an mi pawimawh tak takte’n BJP an zawm chungin MDC pali an tling leh thei a, VC inthlanah pawh pariat an la leh thei a. MNF lak zat pawh hi, tun hnaiah engemaw zat an chhuak a, unit inrem fel lohna te an la nei a, opposition an ni bawk a… BJP an thang uak uak lo tihna a ni ang,” politician pakhat chuan a ti. ZPM-in VC pahnih an la pawh, ZPM hmasawnna tilangtu a nih theih thu a sawi bawk. Chutih rualin BJP chu party lian an ni tih hai rual a nih loh thu a sawi tel.