Siaha pump 2-a dah tur nia hriatchian oil tanker tlangtir

Central Young Lai Association chuan dan kalha Myanmar-a diesel leh petrol hralh a nih loh nana hma an lakna kal zelah July 15 zan khan Siaha-a dah tur diesel phur tanker pahnih chu venhimna hnuaia chhuah an ni.
Thudawn danin, Lawngtlai bul 71 RCC Camp piaha Young Lai Association leh Police duty-na hmunah tanker pahnih, diesel phur ve ve AS 01 DC 6111 Emanuel Pump Siaha-a dah tur leh AS 11 DC 6164 J Rama Pump Siaha-a dah tur chu duty-ten ngun taka an lehkha an enfel hnuah Myanmar lama chheprelh tur ni theia ngaih a nih loh vangin chhuah a ni.
Engemaw palhah heng diesel phur tanker-te hi an dahna hmun an thlen hmaa khawih chingpen palh hlauhthawn thilah venhimna hnuaia kaltir an ni a. Lawngtlai Police-ten Kawlchaw thleng an veng a, Kawlchaw atangin Kawlchaw Police duty-ten Siahaa an dahna tur hmun thleng an veng thung. Tanker pahnih hi Thawhtanni zan dar 9.40 khan duty post atanga chhuah an ni a, YLA duty-ten DCSO Siaha an hrilhhre bawk.
July 15 khan YLA Sub-Hqrs Diltlang duty-te chuan 207 truck pahnih atangin diesel barrel 19 an lo man tawh a. Diesel phurh nana lirthei hman hi MZ 05B 0981 (Yoda) leh MZ 02C 2772 (pic up) niin, diesel hi Lunglei atanga phurh, Chawngte paltlanga Diltlang lama kalpui a ni. YLA duty-ten an lo man a, Myanmar-a hralh tur ngei a ni tih YLA hruaitute chuan an sawi a ni.