Sialhawkin Last 16 an lut

LBS Suzuki 21st Inter Branch YMA Football Tournament 2023 chu May ni 31 Nilaini khan Round of 32 khelh a ni a. Team ngaihven hlawh zinga mi Sialhawk leh Lengpui in hnehna an chang a. Veng leh khua inelnaa chetha fo thin Armed Veng erawh Tlangnuam hneh lovin an tla thung.
Unji Lazi
Kum taa inelna liana chetha a, final hial lut Sialhawk chuan inelna neih mekah pawh ngaihven a hlawh zui leh viau. Sialhawk hian nilaini khan MSSC Ground, Muallungthu-ah Ramhlun North an hmachhawn a, 3-2 a hnehna changin eound of 16 an lut.
Sialhawk hian kum hmasa lamah an lo hneh tawh Ramhlun North hi hneh nawn leh ngei turah ngaiin tum an hreh lohzia social media lamah an lo lantir tawh a. Inringtawk taka inlan an ni bawka hnehna chang zawkah an tang ta nghe nghe.
Sialhawk hian Ramhlun ‘N’ lakah bul an tan tha a, player ngaihven hlawh R. Laldanmawia chuan minute 28-naah hmahruaina goal a thun. Danmawia goal thun bak hi chawlhlawk hmain a luh belh lova, chawlhlawk hnu lamah goal li ngawt a luh belh thung.
Second half tan atanga rei lo minute 58-naah B. Rohmingthanga chuan goal thunin an si phurh a sut. 1-1 a nih hnuin inkhel a hmuhnawm leh zual a, inkhel hmuhnawm takah Sialhawk chu goal thun hmasa zawkah an tang nawn leh. Minute 72-naah Vanlalduata chuan hma an hruai letna goal a thun. Goal thun nawn leh mah se Sialhawk an chak mai bik lo. Hun tawp dawn hnaih minute 80-naah Lalhruaisanga chuan goal thunin an si phurh a sut nawn leh. An inhnehtawk mai dawn emaw tih laiin Sialhawk an che fuh nawn leh a, minute 90+2-ah Lalfamkima chuan Sialhawk hma hruai nawn lehna goal a thun a, he goal hi an chakpui ta nge nge.
Sialhawk in team tlo an nihzia an lantir zui zel a. Lammualah ngei ‘Unji Lazi’ leh ngei an tum hle.
Muallungthu a inkhel dangah Bethlehem Vengthlang chuan 7-0 ngawtin Marpara an sawp a, last 16 an lut ve bawk. Inkhel hmuhnawm takah Sihphir le Darlung te goal awm lova an inhnehtawk hnuin Darlungin penalty-ah 4-2 in hnehna an chang a, last 16 an lut.
Lengpui an chak
Football thiam khua, YMA football-ah pawh lo champion hial tawh Lengpui an kal zel a, nilainiah hnehna changin Lengpui hian last 16 an lut.
Lengpui hian MFA Ground, Sairang Dinthar-ah Seling an hmachhawn a, Lalmuanzuala (5′) Lalengmawia (85′) leh Vanlalhruaitluanga (89′) a te goal thun hmangin hnehna an chang a. Seling goal neih chhun hi minute 84-naa Ramngaihsana thun a ni.
MFA Ground-a inkhel dangah Hualngohmun hmun leh Keifang Venglai te chu hun pangngaiah 4-4 in an inhnehtawk a. Hualngohmun chuan penalty Shootout-ah 7-6 a hnehna changin last 16 an lut ve bawk.
Nilainia hnehna chang langsar zingah 6-0 ngawta Chalrang sawptu Republic Veng te, 3-0 a Bairabi Jt. hnehtu Bawngkawn leh 3-2 Chanmari hnehtu ITI Veng te an tel.
Armed Veng an tla
Football thiam veng, Veng / Khua inelnaa chetha fo thin Armed veng chuan LBS Suzuki 21st Inter Branch YMA Football Tournament 2023 zin kawng an zawh tawp a, last 16 lut zo lovin an tla.
Armed Veng hian an home MAP Ground, Armed Veng-ah Tlangnuam an hmachhawn a, an muala inlan ni mahse Tlangnuam lakah 2-3 in an vanduai. Tlangnuam hian Armed Veng lakah tha zetin bul an tan a, inkhel tan atanga minute 6-na lekah Vicent Lalduhawma chuan hmahruaina goal a thun. Hma taka goal thun Tlangnuam tan hian chawlhlawk hmain goal dang an thun belh leh a, minute 45-naah CVL Remtluanga chuan an goal hnihna a thun a, si hnih faia hmahrauai chungin chawlhlawk an hmang.
Chawlhlawk hnu lamah Armed Veng in an khingpuite lehthal ngei tumin thapui an thawh a, an khingpuite an nawr buai hman hle. Minute 58-naah Lalbiakhlua goal hmangin an si phurh an sut a. An si phurh sut tuma tan an khawh laiin goal dang an chhuah belh tlat thung a, minute 72-naah CVL Remtluanga chuan Tlangnuam goal thumna thunin an hmahruaina a tizau nawn leh. Si hnih an phurh nawn leh hnuin Lalfakzuala chuan minute 89-naah Lalfakzuala hmangin an si phurh sut then mahse goal dang an thun belh thei tawh lova, uiawm taka tlawmin, an tla zui ta a ni.
Nilainia inkhel dangah Thingsulthliah Jt chuan Ramhlun Venglai an hneh a, inlehthalna lian an thlentir bawk. Thingsul Jt leh Ramhlun Venglai te hi hun pangngaiah 2-2 in an inhnehtawk a. Thingsul Jt hian penalty shoot-out ah 8-7 a hnehna changin last 16 an inhlangkai.