Sichuan province-in duh zah fa neih rem ti

China-a Sichuan province-a cheng nupate chuan fa an duh zah zah an neih remtih tawh niin China chuan an population tlahniam zel siam that leh nan theihtawpin hma a la mek.

Nikum khan kum 60 chhunga a tum khat nan China population chu a tlahniam a. Kum sawm tam fa pakhat chauh neih policy a kalpui reng a, kum 2021 khan nupa te chuan fa pathum an neih a remti tawh bawk.
Sichuan bikah chuan fa nei lo te pawhin an duh chuan fa lain an enkawl remtih a ni tawh bawk. A hma chuan kawppui nei lo hmeichhia tena fa an lak emaw remtih a ni lo.

Kum 2016 daih tawh khan China chuan sawihlawh one-child policy kum 1979 atanga hman tan tawh chu a lo titawp tawh a. A hma chuan fa pakhat aia tam nei chhungkua te chu na tak taka hremin an hna thlengin an chan phah thin a ni.

China chu cultural takin hmeichhia aia mipa fa duh zawk an nih avangin one-child policy avang hian nau tihtlak a nasa hle thin bawk.

Kum 2016 atanga policy thlak a ni tawh chungin nau piang an pun phah hleithei chuag lo va. Nikum khan a tum khat nan kum 60 chuang hnuah China-ah nau piang aiin thi an tam zawk a ni.

Chinese President Xi Jinping chuan nau piang tihpun chu ngaih pawimawh berah a nei a. Hei vang hian nupa fa nei te tan sorkar chuan chhiah awl te kalpuiin maternal healthcare tha zawk te a pe bawk.

China mai ni lo a thenawm Japan ah pawh nau piang tlem avangin harsatna nasa tak an tawk mek a. Japan prime minister chuan an ram chu tun ang renga an kal a nih chuan society nih anga che hleithei lo tep dinhmunah an din tep tawh thu a sawi.