Side drain mumal lo tih thata Dawrpui phei cheimawi tum

Dawrpui huamchhunga leh a chhehvel hmun thenkhata side drain mumal lo lutuk avanga kawngpuia tui tling thin tih reh a nih theih nan Aizawl East-II bialtu MLA, minister B Lalchhanzova hoin Thawhlehni zing khan hma lak dan tur enfiah a ni a, tuiluankar siamthat bakah helai chhehvel cheimawi tum a ni dawn.
Assam Rifles awmna lungbang ngheng kawngpui sir tui luankawr tha tawk lo hian kawngpuiah tui a ti tling a, Vanapa Hall kawt pawh tui tling hian a tibuai nasa thin hle tih sawi a ni a. Minister hmalakna bawhzui hian Thawhlehni khan PWD-in side drain hi an hai fai nghal a ni.
Assam Rifles ram, lung bang phei Bazar Bungkawn atanga Treasury Square Trafic Point thlengin fai leh mawi taka enkawl a tul a, sawrkar department hrang hrangte nen a theih anga anga thawkhoin, a tul dan angin MLA fund hmang pawha tha thawh an tum tih B Lalchhanzova hian sawiin, “Helai phei hi Aizawl hmel lanna pawimawh a ni a, a mawiin a fai hle tur a ni. Rawng hnawihin cheimawi a ni anga, pangpar pot-te dahin hmuh nuam taka siam tum a ni. Aizawl thianghlimna leh mawinaa mawhphurtu a inngai zawng zawng, mimal leh pawl thawhho puiah ka sawm a ni,” a ti.
Helai hmunhma felfai zawka enkawl tur hian Assam Rifles leh Aizawl DC nen sawiho a ni tawh a, lungrem phei cheimawi leh tihfai kawngah thawhhona thuthlung siamin hma lak tum a ni tih a sawi bawk.
Assam Rifles lungrem phei ennaah hian PWD hotute, 2 AR deputy commandant leh Dawrpui khawtlang hruaitute an tel a ni.