Sikul naupangte’n uniform inang an hak theih beisei Nilaini-ah 2023-24 academic session atan sikul naupangte’n s

Sikul naupangte’n uniform inang an hak theih beisei
Nilaini-ah 2023-24 academic session atan sikul naupangte’n sikul an lut dawn a, zirlaite’n uniform thar an hak kim thuai an beisei thu education department hotute chuan an sawi.
Mizoramah sorkar sikula lutte’n uniform inang ha se tiin Mizoram sorkarin a rel a, hei hi 2023-24 academic session-a tan tur a ni.
“Harsatna a awm lo turah kan ngai a, naupangte’n uniform thar an hak kim theih thuai kan beisei a, chu chu beiseina nen kan thlir,” education department director Lalsangliana chuan a ti.
Naupangte hak tur uniform hi department-in a buaipui lo a, kum hmasa lam ang bawkin zirlaite’n an ngaihtuah mai turah ngaih a nih thu a sawi.
Sikul hrang hrang tih dan a inang lo a, sikul engemaw zatah chuan zirtirtute’n uniform tur hi an ngaihtuah. Primary school leh middle school naupangin uniform grant an dawng thin a, sikul engemaw zat chuan uniform grant nena siam rem turin puan than te an lei tih thu dawn a ni.
Sikul thenkhat chuan phaiah kalin puan than hi an lei a, mahni sikul naupangte hak tur ngaihtuah hi sikul thahnem tham tak an awm tih thu dawn a ni.
Sorkar sikula uniform inang hak chungchangah hian school education department-in nikum June thlaah khan thu a lo chhuah tawh a, kumin March ni 15 khan directorate-in district leh sub division hrang hrangte a hriattir leh bawk. Zirna inte’n an zawm tha em tih enfiah turin DEO leh SDEO te hriattir an ni.
Primary school-ah kekawr leh pawnfen dumpawl, middle school-ah kekawr leh pawnfen light grey, high school leh higher secondary school-ah kekawr leh pawnfen dum an ha ang a, an vaiin kamis var hak tur a ni.