Tuchel-a’n Bayern chakpui nghal

Inrinni zan khan German Bun-desliga-ah inkhel ngaihven hlawh tak a awm a, table-ah a chung luahtu pahnih Borussia Dortmund leh Bayern Munich te chu Allianz Arena-ah an inhma-chhawn. Bayern Munich manager thar Thomas Tuchel chuan a team thar a kaihruaina hmasa berah a team hlui Borussia Dortmund lakah 4-2 in hnehna a chanpui nghal.
Champion lai Bayern Munich hian an chunga awm mek Dortmund lakah bul an tan tha a, vanneihthlak ang reng takin goal an thawkchhuak thuai. Minute 13-na lekah Dortmund player Gregor Kobel chuan an lamah a ti-goal a, Bayern hmahruaina goal a thunsak. Own-goal hmanga hma an hruai hnuin Bayern hian goal dang an thun belh leh thuai a, minute 18-naah Thomas Muller chuan an goal hnihna a thun. German leh Bayern Munich senior player Mullers hian minute 23-naah an goal thumna a thun belh zui leh zat a, si thum faia hmahruai chungin chawlhlawk an hmang.
Si thum faia hmahruai tawh Bayern hian second-half-ah goal an thun belh leh thuai. Minute 50-naah Kingsley Coman chuan an goal lina a thun a, an chunga awm mek Dortmund lakah hnehna an chang chiang angin a ngaih theih nghal. An elpui lian ber Bayern Munich lakah si li fai ngawta an hnufual tawh vangin Dortmund hi tlawm chiang der anga ngaih ni tawh mah se huaisen takin an inlan chhunzawm a, an khingpuite thlamuang diaiin an awmtir duh bik lova, hun tawp dawn hnaihah goal hnih an thun.
Dortmund tan hian minute 72-naah penalty atangin Emre Can chuan goal a thun a, an si phurh a sut then. He goal hian Dortmund a fuih phur thar a, minute 90-naah Donyell Malen chuan an goal hnihna a thun belh a, an inkar a tizim leh zual. Goal dang thun belh tumin an khingpuite nawr chiam mah se hun an nei tam tawh lova, an si phurh an sut zo thei lo va, an elpui lian ber lakah an hmahruaina an hloh zui ta nge nge.
An mualah hnehna pawimawh tak an chan vangin champion Bayern Munich hi table chung berah an kir leh a, an elpui lian ber Borussia Dortmund hi point hnihin an lehpel. Bayern hian Dortmund hnuaiah awm a, beisei an phak loh vangin an manager Julian Nagelsmann an ban a, chhanhimna beiseiin Dortmund manager hlui Thomas Tuchel chu an manager thar atan an la lut. Tuchel hnuaia an inlan hmasakna berah mit la takin an inlan a, hmahruaitu Dortmund hi 4-2 in an hneh a, vawo 10 zet chak zawn tawh Dortmund kal tluang lai an titawp.
Dortmund lehpela hmahruaitu thar Bayern Munich khelh 26 atanga point 55 hmuin point hnihin hma an hruai a. An lehpelh tak Dortmund khan khelh 26 atang thoin point 53 an hmu mek. Vawi 11 zet champion zawn tawh Bayern Munich rorelna titawp thei bertu chu Dortmund hi an ni a, champion ngei tumin khelh hmabak an la neihah thapui an thawh zui ngei ang.