Silai tel lova zalenna sùal…

Ex MLA pakhat chuan, ‘silai nen kum 20 chhung zalenna kan sual a, remna neih hnuah silai tel lovin, dan hnuaiah zalenna hi MNF ten kan la sual reng…’ tiin a sawi a.
‘Zalenna sual’ tih hian kawh a nei a, chu chu— ‘ram dang thuhnuaia kun lova mahnia ro inrelna’ (sovereign state/independence) nei tura beihna’ tih hi.
Tun kan ram dinhmun mekah hian ‘zalenna sual’ tihin awmze dang pakhat a neih leh theih chu, ‘thenawm state thuhnuaia kun mekna ata zalenna’ tih a ni.
Silai tela zalenna sual kha chu India ram atanga indan tumna a ni a, tuna silai tel lova zalenna sualna tur erawh hi chu thenawm state thuhnuai atanga tal chhuah tuma beihna a nih phawt loh chuan, zalenna neih hi a harsa dawn hle tih a hriat theih mai awm e.
Eng tin nge thenawm state thuhnuaiah kan kun? tih chu zawhna hmasa a ni ang a. |henawm state thuhnuaia kan kun mek dan hi chu kan hre vek ang a, ei leh bar eng pawh mai deuhthaw hi thenawm state atanga kan chawk luh a ni a. Kan ram chhunga ei leh bar kan tharchhuah ve hi chu Mizoram mipui 20% eikhawp pawh a ni mang lovang.
Kan hriat hnu vek a ni: Leimin avanga inkalpawhna kawng a chhiat chang te, eng pawl emaw lungawi lo ten inkalpawhna an dan chah chang tea kan experience chu sawi tam ngai lovin kan hre bel hle tawh. Silchar lam kawng a pin apianga ‘state dang nena inkalpawhna kawngpui tha neih a ngai a ni’ tih reng mai te hi a hahthlak.
Zalenna kan sual dawn a nih chuan, tuna kan harsatna zawng zawng ei leh bara intodelh lova kan awmna bawih ata tal chhuah te, kawngpui pakhat a pin avanga state pakhat tal buai nghal rikngawt lak ata zalenna te pawh kan sual chhuah phawt a ngai.