Silpaulin sem runpui nei

Lunglei North bialtu MLA, High Powered Committee vice chairman V Malsawmtluanga chuan Inrinni khan a bial chhung khaw hrang hrang fangin, kuthnathawktute tan silpaulin a sem bakah amah dawr duhte tan inkawmna hun (public interview) a buatsaih a. Bial chhunga hmasawnna hnathawh thenkhat a endik bawk.
Thingtlangmi kuthnathawktu leh a mamawh apiangte tan silpaulin sem runpui buatsaih a ni tih V Malsawmtluanga hian sawiin, a bial chhung khaw 21-ah kumin buh seng hma ngeia sem chhuak vek turin hma lak mek a ni tih a sawi. Mipui chu sawrkarin ‘Bana Kaih’ ruahmanna an ban phaka a chhawp chhuah chu thlirliam mai loa, chhawr tangkai tum turin a chah.
Lunglei North bialtu MLA-in a bial chhunga silpaulin a sem hi 2000 a ni a. Silpaulin a sem bakah hian PHC Haulawng tlawhin, Cyclone Remal-in a tihchhiat HPC fund hmanga thawmthat hna thawh mek a endik. A lo tiam tawh angin he damdawi ina x-ray khawl dah tura hma a lak zel thu sawiin, a building sakna tur hmun a en nghal a ni.