Sinner a chak awlsam

Thawhlehni khan Australian Open 2026 khelh chhunzawm a ni a, champion lai Jannik Sinner chu a vawi khat nan a inlan. Sinner hian Hugo Gaston a hmachhawn a, awlsam leh hahdam taka hnehna changin second round a lut.
Australian Open-ah vawi hnih champion zawn tawh Jannik Sinner hian Hugo Gaston a ngam viau a, set khatnaah game hnih chiah a hloh a, awlsam takin set a la nghal. A khingpui hian kawng hrang hrangah a khan lo a ni ber a, set khatnaah a chungnung nghal tak zet.
Set khatnaa aiin set hnihnaah Sinner hi a chungnung leh zual a, game khat bak a hloh duh tawh lo. Game thum chauh hloh chunga set a lak zawn hnuin set thumnaah a khingpui a inhliam a, inlan zui tur a awm tawh lo. A khingpui a inhnuhdawh vangin Sinners hian 6-2, 6-1 in hnehna a chang a, second round a inhlangkai zui ta a ni.
World No. 2 Jannik Sinner hi Australian Open-ah a khel tha thei viau a, kum hnih chhung chu hneh thei an awm tawh lo. A lungthu kim nan champion ngei tumin a inlan zui dawn a, a champion nawn leh thei a nih chuan Grand Slam-ah vawi nga a champion tling chiah ang a, a elpui lian Carlos Alcaraz a hnaih leh zual ang. No. 1 Alcaraz hi Grand Slam-ah vawi ruk a champion tawh a, Australian Open-ah hian a la champion lo thung. A la champion ngai lohna Australian Open-ah a champion thei a nih chuan Grand Slam pali-ah a champion kim ang a, Career Grand Slam a puitlin chiah ang. Sinner pawh hi Australian Open, Wimbledon leh US Open-ahte a champion tawh a, French Open-ah a la champion ve lo thung.
Australian Open-ah hian champion ngun ber chu Novak Djokovic a ni a. Djokovic hi Sinner leh Alcaraz kawng dal thei tur khawpin a la tha.