Sipai luah rama ram neite insawifiah turin ti
Revenue department chuan Aizawla sipai luah rama ram neite insawifiah turin an ti a, an ram neih ‘cancel’ a nih loh chhan tura sawi tura hriattir an ni.
Land Revenue & Settlement department-in March ni 24, chawlhkar liam ta Zirtawpni khan insawifiah tura tihna (show cause notice) hi ram neitute an pe a, ni 30 chhunga insawifiah tura tih an ni.
An lehkhaa a lan danin, sipai luah ramah ram neihna certificate nei thlap mah se heng hmuna ram lo neih hi Mizoram (Restriction on use of Transferred Land) Act, 2002 hmanga khap a ni a, sipaiin an chhuahsan hunah heng ram hi mipui tan chauhva hman tur a nih avangin, mi dang tan ram lo neih phal a ni lo. Danin a phal loh avangin, sipai luah rama an ram neihna chu cancel a nih loh chhan tur ni 30 chhunga sawi tura tih an ni.
Aizawla sipai (Assam Rifles) awmna hmun hrang hrangah mi hrang hrangin ram an nei a, Lammual ramah mi 54-in LSC an nei a, Assam Rifles commandant bangalow ramah mi paliin, McDonald Hill-a Assam Rifles ramah mi pathumin an nei bawk. An zinga mi pariatin LSC hi an pe kir tawh a, sipai luah ram hmun thumah mi 53-in LSC an nei mek.
Revenue minister Lalruatkima chuan sipai luah rama ram lo neih hi khap a nih thu leh kum 20 chuang kal taah khan sorkarin Mizoram (Restriction on use of Transferred Land) Act, 2002 a lo siam tawh thu a sawi a, chu dan hmang chuan sorkarin ram neihna hi cancel a tum thu The Aizawl Post a hrilh.
Sipai luah rama ram neih chungchangah court-a kal an awm a, court thu kal lai a nih avangin sorkar tan chet theih a ni rih lo a, a theih veleh insawifiah tura tihna hi chhuah a ni ta tih a sawi.
Sipai luah rama ram neite insawifiah turin ti
Get real time updates directly on you device, subscribe now.
Prev Post