SIR neih mekah MZP-in Chakma khua thenkhata punna ringhlel
Election Commission of India-in Special Intensive Revision (SIR) a kalpui mekah India khua leh tui leh Bangladesh khua leh tui nihna nei kawp hmuhchhuah an ni tih Mizo Zirlai Pawl chuan sawiin, 2005 behchhana roll ennawnah hian Chakma khua thenkhata a punna sang lutuk chu ennawn an duh tih an sawi.MZP Gen. Hqrs. president Dr C Lalremruata chuan, MZP-in kum 1995 atanga Mizorama rawn lut Chakma foreigner-te, India khua leh tui nihna pawh nei lo, electoral roll-a thun luh chawp an nih thin avanga hma an lo lak tawh dan hrang hrang leh, hma an lakna avanga roll dik tak zawk neih a lo nih tawh dan a sawi a. Tuna ECI-in SIR 2026 a kalpui mekah pawh, tunhma atanga foreigner pun chakna thin constituency thenkhat an enfiah tih a sawi a ni.
“SIR-in a base 2005 electoral roll leh roll thar ber (2024) atangin danglamna khaikhin a ni a, Chakma khua bikah vote percent punna sang lutuk leh 2005 e-roll a khaw awm lo, 2024-a khaw 97 awm thar leh India leh, Bangladesh khua leh tui nihna nei kawp MZP-in a hmuchhuak a, e-roll a house number awm lo pawh hmuh chhuah a ni. Chief electoral officer hnehah complaint thehluh a ni dawn a, complaint-a tarlan khaw 195 chu SIR kalpui mekah en uluk lehzual turin kan ngen,” a ti.
Heng khaw 195-ah hian SIR kalpui a nih tawh pawhin, DEO nen ngei ennawn leh turin MZP chuan a ngen a, he hmalaknaah hian a tul anga thuneitute thawhpui a inhuam reng tih a sawi a ni.
Tunhma atanga Chakma foreigner-te avanga Mizoram khua leh tui dik takten harsatna an tawk fo thin pawh hriatthiam har an tih thu MZP president hian a sawi a. SIR kaltlanga dan loa electoral roll-a awm zawng zawng paih vek turin CEO Mizoram leh a hnuaia thawk DEO, ERO leh AERO te a ngen a. Booth level officer-te pawh rinawm leh dik taka thawk tur leh khua leh tui nilo paih ngam turin a ngen nghal tih a sawi bawk.
MZP sawi danin:
8 2005 e-roll a khaw awm, 2024 e-roll thlenga khua la awm 98 atanga voters awm chu 57103 a ni.
8 2005-ah hian voters 43540 awmin voters 13563 (31.15%) in a pung.
8 2005 e-roll a khua awm lo, hemi hnu lama ding thar (2024 e-roll thlengin) chu khua 97 a ni a, voters 39428 an awm.
8 MZP-in foreigner avanga buaina tawh fo thinna khaw 195 a chhinchhiah atangin, 2024 e-roll ah voter 96531 an awm a. 2005 e-roll voters 43540 nena khaikhin in voters 52991 (121.70%) in a pung.