SIR tih mekah state dang ami tan an awm duhna thlan theih: – CEO Mizoram

India ram leh khua leh tui dik tak, Mizoram-a chhan engemaw avanga awm duh zawk tan anmahni duhthlanna ngeiin Special Intensive Revision of Electoral Roll kalpui mekah a inziahluh theih tih chief electoral officer Mizoram Garima Gupta chuan a sawi.
CEO Mizoram hian Ningani khan thuthar thehdarhtute a kawm a. Zawhna a chhan danin, Manipur a ni emaw state dang ami pawh nise, India khua leh tui dik tak an ni ngei tih finfiahna tha tawk an neih phawt chuan, Mizoram electoral roll-a chuang duh zawk chu electoral roll thar kalpui mekah hian an inziaklut thei tih a sawi.
SIR 2026 tum ber chu, vote nei thei zawng zawng electoral roll-a thun vek an ni a, hmaih leh lang tura inngai lang lo an awm a nih chuan sawi leh sel hun hawn a nih chhungin inziahluh dan tura duan sa hmangin an inziaklut thei tih a sawi a. Langtlang leh felfai takin, sawisel tur awm loa kalpui chu Election Commission of India duh dan a ni tih a sawi a ni.
Chutihrualin, danin a phut anga vote nei thei lo tur emaw, thi tawh emaw, paih ngai ang chi paih chu he SIR hian a tum tel tho tih a sawi bawk.
SIR 2026 atan hian enumeration form hi district zawng zawngah download fel tawh niin, Phase-III SIR kalpui mektu state 16 zingah Mizoram chu enumeration form download zo thei hmasa ber a ni tih CEO hian a sawi a. Form print hna hi ECI chuan May 29 thleng hun pe mah se, May 22 hian zawh theih an inbeisei tih a sawi a ni.
Election hotute chuan, May 30 atanga June 28 chhunga Mizoram puma electoral roll revision neia in tina booth level offficer ho an kal hunah enumeration form hmanga lo inziaklut vek turin mipui an ngen a. Kum 2005 roll-a anmahni emaw an thlahtute hming emaw chuang lo chu Form-6 hmangin electoral roll-a luh dilna an thehluh a ngai dawn tih an sawi a ni.
Tun electoral roll revision-ah hian 2026 July 1-a kum 18 tling chin chu voter thar atan telh theih an ni ang.