Skill training

India sawrkar chuan school/college chhunzawm thei lote leh, thalai hnathawh tur nei lote tan, eng emaw ber themthiamna hmanga ei an zawn ve theihna turin themthiam zirna ‘skill training’ a buatsaih thin a, chutiang atan chuan sawrkar hian insenso hi a inhuam hle thin.
PMKVY Scheme hnuaia skill training pek chungchangah Mizorama thil felhlel eng eng emaw thleng chungchang chu CAG report-ah tarlan a ni a. Kum 2018-20 inkar chhung khan PMKVY Scheme hnuaiah Mizoram thalai 7,785 chu skill training pek an ni a; heng zinga mi 1,021 te chu guidelines-in skill training nei thei lo tura a tihte an ni a. Heng mite hi a then chu kumtling lo, kum 14 leh a hnuai lam te, a then chu kum 35-60 inkar te an ni a, a then chu kum 60 chunglam te an ni bawk.
Hetianga kum bithliah tling lo leh bithliah pel tawh zawkte mi sang chuang lai mai thlan an ni hi, an lo tangkaipui viau a nih chuan a lawmawm lamah a ngaih theih mai ang a; mahse, dan bawhchhiatna erawh a ni tho. Chutih laiin, heng mi sang chuangte hian chhui chian zui zel hi an dawl meuh ang em tih pawh hi zawhna pawimawh tak a ni a; record lamah chauh hming chuang, a taka mihring hmuh tur awm lote hi an lo ni nawk mai ang em? tih hi zawhna awm thei a ni bawk.
Training Centre chungchangah pawh, guidelines ang lova vehicle workshop hman a ni tlat leh, trainee zinga mi 30 zet maiin training centre, workshop ni nghal bawk sia hna an hmu thar nghal mai te pawh hi, CAG report-a tarlan a nih ang hian, workshop-a thawk sa mi 30 te hi trainee anga enroll an nih chuan sum siamna a ni thei dawn tihna a ni.
Hetiang thil felhlel thlengah hian, a kaihhnawih department mawhphurhna a sang hle a, duh leh tum tan chuan fel taka thil kalpui a harsa lo hle tih a lang a; skill development department lamin tan an lak sauh sauh a pawimawhzia a lang e.