Skywalk case-a lang ve in party-a a nihna a bansan

Sawrkarin skywalk leh ropeway siam a tum, zuzi zui taa sum tihchingpen awm nia sawi case-a lang ve Congress MLA hlui chu an party-a a nihna atangin a bang.
Zirtawpnia Congress Bhavan-a inkhawmah Lalrindika Ralte hian MPCC president Lal Thanzara hnenah MPCC general secretary a nihna atanga banna thehlutin, skywalk leh ropeway thubuaiah a hming a lang ve a. Ngun taka a ngaihtuah hnu in, heti chunga party-a nihna a chelh zui zel remchangin a hre loa, banna hi a thehlut tih a sawi.
“Dikna kan auchhuahpui lai a, rin loh taka ka hming a lo lang hi pawi ka ti a. Heti chungta party-a nihna pawimawh tak chelh hi a remchangin ka hre lo,” tiin a ban chhan a sawi.
Kum 2018- 2023 term chhunga Hachhek bialtu MLA Lalrindika Ralte hian skywalk leh ropeway thubuaia a hming a lang chu mak a tih thu leh, thudik a lo lan thuai a beisei thu a sawi a. A hming lang ve mah se, a tana hlauhthawn awm tur awma a hriat loh thu a sawi.
Banna a thehluhnaa inkhawmah hian thu sawiin, kan ram hetiang dinhmuna a din chhan hi kan hriatna thuk tawk loh vangte, Sap tawng emaw Vai tawng emaw kan thiamloh vangte, hriatna kawngah hnam dang kan phakloh vang niin a hre loa, duhamna leh mahni hmasialna vang zawk nia a hriat thu sawiin, “Politics kan buaipui hian mahni hmasialna leh duhamna hi kan hmelma, diklohna kan hua a nih chuan keimahnia diklohna hi kan huat hmasak ber tur niin ka hria,” a ti.