Smart City Mission kum 8 tlin lawm

Smart City Mission kum-8 tlin lawmna atan Aizawl Smart City Limited leh Mizoram Cycling Association chuan Inrinni khan cyclothon an buatsaih.
Vailiamtu UD&PA changtu deputy chief minister Pu Tawnluia chuan kum 8 kalta khan Prime minister Narendra Modi chuan Smart City Mission hi a hawng a. India ram puma khawpui 100 thlan chhuahah kalpui a ni, tiin, “Khawpui tih changtlun leh tih changkan chu he mission tum ber a ni,” a ti. Smart City hnuaia khawpui thlan zinga tel tur chuan tehfung hrang hrang a awm a, Mizoram pawh chu’ng tehfung a zawhfel hnuah kum 2018 khan pawm a ni tih a sawi. Covid lengin kum hnih chhung a thutchilh avangin duh angin hma lak chak theih ni lo mah se, Aizawl khawpui thuammawia tih changkanna’n tun dinhmunah project 40 chuang kalpui mek a ni tih a sawi a ni.
Smart City hnuaia hmalaknate chu kum 5 chhunga zawhfel tur tih a nih laiin, Covid vangin kum khat Ä‘ang pawhsei a ni a, nakuma zawh hman tumin an kalpui mek tih a sawi bawk.
Smart City Project hnuaiah thalaite hmakhua ngaiin an hawiharhna tur leh khawvel zau zawk an thlirna tur project hrang hrang kalpui mek a ni tih Tawnluia hian a sawi a. Thalaite changkanna leh hmasawnna atan nasa taka thawh mek a ni, tiin, Smart City project hnuaia sak playground, information Kiosk leh intihhlimna hrang hrangte chu dimdawi a, neitu rilru pu theuh turin a chah. Aizawl veng tina mipui thawhho puiah a sawm bawk.
Cyclothon-ah hian cyclist thahnem tak an tel a, Vanapa Hall Kawt atangin Thuampui Veng thleng an tlan a ni.