Kumin MLA inthlanah Pathianin an mamawh tawk MLA leh vote a pe dawn tih MNF president Zoramthanga chuan a sawi.
Thawhlehnia Saituala neih Tawi East MNF Block Conference a hmanpuinaah Zoramthanga chuan MNF-in underground leh overground-ah harsatna tam tak a lo paltlang tawh a. Tun thlengin harsatna chu a la tawk reng a. Ram siamthat hna an kuta dahtu Pathian hnathawh hmanga chinfel thin a ni tih a sawi.
MNF an ral mai dawn, ti thintute leh nuaibo tumtute chu anmahni an ral vek tawh zawk a. Pathianin MNF a hruai a. India rama party upa ber zing ami leh tlo ber zing ami a ni tih sawiin, “Mautam tam lai leh Covid hrilen laia min sawrkar tirtu hian term tharah chuan malsawmna min vur ngei ang tih ring ang u. Lalpa’n kan mamawh tawk chiah MLA leh vote min pe ang. Kumin inthlan kan neih turah hian tumah zam lo ang u,” tiin party mite a fuih.
MNF-in engmah a ti lo, ti thinte chuan MNF sawrkar hnuaia hmasawnna tam tak en rawh se, tiin chief minister hian, “MNF sawrkar hian a thil tih tum ang a ti lo, tia demtute hian, Covid vanga khawvel ramdangten an tih tum an tih bik loh zia an hriat a ngai a. Dam khawchhuah kan tum hram hram zawk a ni,” a ti.
Tunhnaia Manipur chief minister nen an inbiaknaah MNF-in a din tirh, 1961 October 22 atangin Zohnahthlak inzawmkhawmna chungchang an lo buaipui daih tawh tih thu a hrilh tih a sawi a. Tun thlengin MNF chuan Zofate rorelna pakhat hnuaia awm hi a la bei reng a. Pathianin mak tak leh hriatthiam harsa takin a hruai zel tih a sawi a ni.
ZPM party chu thuneitu ber pawh hriat theih an ni loa, an chapona avangin an talbuai mek niin MNF hruaitu hian a sawi a. “Kalphung thar hritlanin an hritlang a, an bang sup sup mai a ni,” a ti.
Pathianin kan mamawh tawk MLA leh vote min pe ang – Zoramthanga
Get real time updates directly on you device, subscribe now.