SMART METER : ELECTRICT BILL

Hemi chungchang hi engmah thiam leh hriat chu ka nei ve lo naa, ka ngaihdan mawlmamg te te chu ka’n sawi ve mai mai ang e. Mizorama electric smart meter kan han hman ve tak hnu hian, kan current hman man bill chu a lo tam ta hluai anga mi thenkhatten an sawi hi thil ngaihbel theih tur tak chu a ni ve thei tho mai, tih chu kei pawhin ka lo ngaih ve dan pakhat chu a ni a. Mahse, thil engpawh mai hi a nihna tak hre chiang lo leh fiah peih loh leh fiah thiam bawk si lo chunga lo sawi ve chiam kha chu ka ngam ve lo a ni.
Electric meter hlui leh a bill dan hluiah kha chuan mi thil chik mi leh a peihte tan kha chuan kan electrict bill dik leh dik loh te kha chu kawng hrang hrangin mahni pawhin a lo chhut ve vek theih thin a ni. Electric bill lehkha, a bill body-ah khan engkim kha a inziak lang nghal vek thin a. Thla hmasaa kan unit hman ral, kan consumed zat leh tun thla bill lo kala kan unit hman ral zat te kha a lang vek thin a ni. Chu chu an paih dik em? An chhut dik em? tih te kha chu mahniin lo chhut ve mai tur a ni. A chhut dan turah lah chuan, unit kan hman ral zat kha hlawm hrang hranga an then dan leh chumi hlawm tin chu unit khat man rate hrang zela chhut dan nen lam khan bill lehkhaah khan an rawn tilang nghal vek bawk thin a ni. Chutiang chuan mahni khan lo chhut ve mai tur a ni.
Chu chauh pawh a ni lo. Thla hmasaa unit kan hman ral zat min bill hnua tuna kan lo hman ral leh tawh zat pawh kha tuna bill min rawn pek rual khan an en nghala, chu chu tun thla kan bill lehkhaah khan, present reading tiin an ziak lang nghal thin bawk a ni. Tichuan, thla leha kan bill lo kal tur zat pawh chu duh chuan mahniin kan lo inchhut chhuak lawk ve vek thei thin ta bawk a ni. Tin, meter reader ten meter reading an rawn neih thin hun awm velahte khan mahniin meter kan lo en ve peih phawt chuan, tun thla bill min rawn pek hma pawhin a thla leh thlenga kan bill zat tur awm ang pawh chu mahni pawhin kan lo chhut ve mai mai thei thin bawk a ni. Tin, meter reader ten kan meter an en laiin kan unit hman ral zat metera lo lang chu an ziak dik em tih pawh kha kan duh chuan kan lo enpui ve thei bawk thin a ni. Chuvangin, kha’ng hun laia complaint tam tak leh kan lo phunnawina tam tak kha chu thil kan hriatthiam tawk loh vang a lo ni duh thin khawp mai.
Amaherawhchu, tuna smart meter kan han hman ve takah hi chuan, ka han en ve ngial pawh hian, kei lawr pawh pass ve lo tan hi chuan a ngaihna hi a awm ngang lo chu a ni ber e. Number hrang hrang kha a rawn inlan chhawk phe ang zuk zuk a, enge a awmzia tih lah chu ka hre ve thei ta hauh lo mai a ni. Han zawh fiah ve deuh turin bill min rawn petute nen lah hian kan intawngfuh hleithei thin bawk si lo. Ngawi renga kawngka pawnlama an lo dah loh leh, chhunglam kawngka bul maiah te hian an lo dah thin bawk thul. Chubakah, kei mi ti kher kher leh thil zawt chik thin tak hi chu heng bill min rawn petute hi chuan ka hriat duh zawng zawng pawh chu min hrilh theih chiah pawh chu ka ring lo deuh bawk a ni.
Tin, an bill body atang ringawt phei hi chuan kei chuan ka chhut ve thiam tawh lo bawk a ni. A lehkha a te tawhin thil an inziak tlem tawh si. Unit khat kan hman ral zat man rate chhutna, a pawisa puntirna niawm tak, multiplying factor tih an ziahah chuan 1(pakhat) tih hi a inziak a, mahse, chumi nen chuan kan bill zat chu a dik thei awzawng bawk si lo. Kei lehkhathiamlo hi chu ka bo ta map mai a nih hi.
Hemi chungchang zawt fiah tur hi chuan tunhma angin an office ka pan peih tawh si lo. A chhan chu, min lo hrilh fiah dan kha ka man fuh thiam chiah lo emaw, midang hnenah ka sawi leh chhawng thiam chiah chuang lo maithei bawk si a. Chuvangin, tutute emaw phunnawi karah leh sawrkar sawifiahna kar velah hian heti hian ka lo hawi a vel ve mai mai ta hrih chu a la nih hi. Chuvangin, sawrkar hian an bill dan system, an bill dan method hi fiah fek fawkin mipui zawng zawng hriat turin Chanchinbu leh TV-ahte hian rawn sawi teh se. Tichuan, rilru mumal lo deuhva min awmtir reng lovin, eng eng emawte chu mahniin kan lo hrethiam ve deuh thei mahna.
Buaina chinfelna tur tha deuh mai pakhat chu, khawimaw lai hmun him takah emaw, tu emaw mi rinnawm tak inah emaw hian meter hlui leh smart meter hi connection khatah ni 10-15 vel a ruala virtir theih dan hi awm se la, chutah chuan thil awm dan chu a chiang mai ang. Mahse, chu hmun leh chu thil chu tuma tih danglam theih loh a ni tur a ni. Kan inah te hian rawn ti duh se a nia ka tih.
Engpawh ni se, smart meter kan hman tak avanga kan bill chu sang ta riauva mi thenkhatin kan hria hi chu, a nihna takah hi chuan kei hi chuan ka ring ve chiah lo deuh bawk a ni. Kan ngaihthat loh chhan hi chu mipui nawlpui hi chuan a bill dan system leh method kan hriat loh vang a ni phawt ang. Tin, India sawrkar leh Mizoram sawrkar kan lo ring chhe lutuk hi chu kan at vang leh kan rilru hniam lutuk vang mai mai a ni thei bawk ang. Heti ang India ram pum thilah hian engtinnge sawrkar hian mahni mipuite chungah chuan thil chhe tak, lang chhuak leh mai thei tur chi chu a tih duh tehlul ang le. Khawvel sawrkar dang zawng zawng mitmei pawh nasa takin a veng ang chu. India ram leh mipuite hmasawnna tur leh awlsamna, thil tih dan fel fai zawkna tur atana ngaihtuahna nasa tak senga technology changkang an rawn duan chhuah hi, a hmangtu turte chu India mipui zawng zawng, mi thiam leh mi fing bawn pui pui, mi lian leh sawrkar hotute zawng zawng nen kan ni a. Thil dik lo leh hlauhawm leh tenawm inphum ru chu ni se la e, keini aia fing bawn turu pui pui, he India ram zau lutuk, mihring chhiar sen lohte zingah hian an tam tih hi hriat tur. Chu lam chu sawi thui lo mai ang. Thil fel lo a lo awm tak tak ta a nih leh hunin a la hril ang chu.
Thil nihna tak tak pawh ni lo, tuna hriat chian pawh ni bawk lo thil, mahse, sawrkar lai sawi chhiatna tur leh beihna tur remchang hmuh apianga bengchheng hluaia, boruak siam vak tum thin hi India ram opposition apiangte tih dan a ni ve hrim hrim a ni. Inthlan apianga a chak lo zawk apiangin electronic voting machine, EVM pawh nasa takin an puh ziah hi. Rahula Congress phei chuan an ching lehzual. Mahse, sawrkarlaipui leh state sawrkar pawh vawi tam an lo inthlak tawh thin, tuin nge EVM dik lohna tak tak chu hmu chhuak thei ta awm le? He smart meter chungchanga khawimaw lai vaiho video lo lang vel mai maite kha innghahna tlak a ni lo. Vaiho chu a dik a dawk pawh thlu lova mahni duh lam zawng zawnga tawngpawng buaina siam vak leh rik luai luai ching, chhe tak tak leh chimawm tak taka khawsak ching an ni. Chu chu keini pawhin kan entawn tan mek bawk.
Tin, khatiang khawimaw lai video i hmuh fuh siamtu vaiho kha han hre chiang la chu e, keini aia mawl fe zawk, keini aia changkang lo fe zawk, keini aia daikilkar fe zawk, keini aia sual fe zawk leh keini aia rilru chhe fe zawk an lo ni duh thin khawp mai.
West Asia indo tantirh lai vel pawh khan India rama gas tlakchham thu kha khawimaw lai vai chhe tangrang video siam pawh a darh chiam tawh kha. Kan veng group thleng thlengin an rawn suanlut leh ta nghal a. Vawiin thleng hian gas chu kan la nghei si lo chu a nih hi.
Chuvangin, thil hi a nihna tak kan hriat chian fak hma hi chuan i ri luai luai thin tawh lo teh ang u.
A thuhrimah hmana kan electrict bill zat ang kha tunah chuan a ni reng thei tawh lo tih ngaihtuah thiam nachangte hi i hria ang u. Chhungtin mitin hian hma kan sawn zel. Chhungtin mitin intin hian nitin hian electric thahrui current kan hman ral zat hi a pung nasa tawh lutuk. Aizawlah phei chuan bungrua leh hmanrua, te tak te atanga turu tak tak thleng hian engkim mai hi current hmang kan lo nei deuh ta fur mai a nih hi. Khawpuiah phei chuan reilote current a awm loh hlek pawhin kan buai zo vek tawh thin a nih hi. Chuvangin, hmana electrict bill kan chawi zat ang reng kha chu tunah chuan la chawi reng i tum tawh lo teh ang u. Kan ngaihtuahnate pawh hi i ti changkang ve deuh tawh teh ang u hmiang.
Keini chhungkua pawh hi regular member chu 3, mahse, 3 chauh nih loh chang awm ve deuh reng, Aizawl mi nawlpuite aia khawsa hniam kan ni a. Mahse, kan in chhunga electric kan hmanna hi a lo tam ve khawp mai. Bulb 31, ceiling fan 3, table fan 1, computer 1, washing machine 1, fridge 2, chimney, istiri, englai pawh deuhthawa tuilumna rice cooker 1, TV, current hmang water filter, a chang changin air purifer, sam tihrona, torch light leh phone charge leh thil dang electric hmanna tur a lo la awm bawk thin. Chuti chung chuan, tunhma deuhva cheng 1000-1300 vel chawi thin khan, tunah chuan cheng 1400-1800 vel kan lo chawi thin ta. Kan hman nasat dan nen chuan a na kan ti hran love. Electric kan hmanna ho ka rawn sawilan kherna chhan hi chu, midangte pawhin in lo inchhut thiam ve deuh theih nana ti ka ni e. Chuvangin, a enga mah hma hian sawrkar hi dem nghal ringawtin i ri hluai nghal ngawt zel lo teh ang u.
Thil pakhat-Mizoram UT nih chhoh vel lai, pawisa tam thut chhoh lai, contract hna trau treh lai, contract hna ngaihsan lai, Aizawl tlangval lu buk satliah ho pawhin inhlawhfa nih chu an zah tlat lai, ‘Vawiinah lung puin rawn inhlawh ta che’ tia sawm chuan an duh miah loh laia, ‘Contract-in lung rawn pu ta che’ tih chuan an duh leh em em si hun lai vel khan, kei pawh zan College kal chungin chhunlamah chanchinbu ka sem thin. Kan College kalpui nulate ina sem chu nuam ka ti bik chiah thin lo. Mahse, sem lo thei lo dinhmuna ding kha ka ni miau si a. Chutih lai tho chuan PWD Muster roll mistiri pawhin ka thawk bawk thin. Khatih lai kha chuan chanchinbu kha mitinin kan la hlut avang khan, a man pawh phur takin an pe thin. Min pek tlai chang chuan an inthlahrung thei em em thin a ni. Tun tlai khawhnu, Covid 19 hri len tantirh lai vel thleng khan chhunglama thlarau hna thawh avangin Makedonia chanchinbu chu ka sem leh ta zak zak a. Mi thenkhatte phei chu a thlawnin ka laktir thin. Keima pawisain office lamah ka lo hnawhkhat leh mai thin a ni. Inthlahrung taka a man ka dil changa phur taka a man pe an awm laiin, “Kan pe tawh a ni lo’m ni? Kan la pe lo em ni?” ti tawk pawh an awm ve tho.
Chuta ka thil hriat chhuah tak chu hei hi a ni-Mihringte hian kan dawn tur, kan chan tur, kan ta tur lamah hi chuan kan duham thei em em a, a tam thei ang ber dawn thuai thuai hi kan duh thin a, kan phur theiin kan nghakhlel thei hle thin a ni. Kan pek tur lam ve thung erawh hi chu kan pe hreh ngawih ngawih a, pek tur lama rilru na tlat thin, sawi nawi kawi tur kan zawng a, a tlem thei ang ber pek emaw, pek loh dan ringawt emawte hi kan zawng thin. Kan lo pe ta hram a nih pawhin ui takin kan pe fo thin tih te mai hi a ni e.
Mi dang hnenah leh sawrkar hnena kan pek tur leh kan chawi tur lamahte pawh hian chian thar leh pian thar te hi kan ngai deuh lo maw?