Smoking Area nuai bo …

Vawiin hi World No Tobacco Day ni mah se, India ramin No Smoking Day March ni 8-a kan lo hman tawh kaihhnawiha ‘smoking area’ chungchang kha han tuihnih ila, a inhmeh tho awm e.
No Smoking Day denchhen khan doctor rual leh cancer vei bakah hotel association hrang hrangte chuan hotel, restaurant leh airport-a Smoking Area dah thin chu nuai bo tawh turin sawrkar an ngen a. Vaihlo khapna dan COTPA 2003-ah hian hotel, restaurant leh airport-ah te smoking room siam theihna dan a awm a, chu chu nuai bo turin an ngen ta a ni.
A nihna takah chuan, mi chi hrang hrang fuankhawmna restaurant leh hotel-te hi chuan customer hip nan smoking room neih te chu duh zawk awm tak an ni a, mahse secondhand smoke chu nasa taka mihring hriselna khawih pawi thin a nih hriain an eizawnna lam aiin hriselna an ngai pawimawh zawk tihna a ni ber awm e.
Mizoramah pawh COTPA dan kenkawh a nih a, puipunna leh khawlaia meizuk khapna dan khauh deuh zawka kenkawh a nih tantirh lai vel khan, smoking area khan ngaih pawimawh a hlawh ve riau a; hospital hung chhung hmun hrang hrangah leh, damlo ward atanga hnaivai tak tak, vaihlo khuin damlote a ur vut vut theihna hmunah te khan meizu mite dinkhawmna tur rin bial kha a awm thluah mai a. Rin bial chhunga meizu hovin mei an han zu tak tak kha chu, secondhand smoke-in hospital building a bawh paw chuk thei hial a ni.
Kha thil tha lo tak kha chanchinbu lama tarlan a nih hnuah hospital compound chhunga ‘smoking area’ zawng zawng nuai bo nghal vek a ni a, tun thleng hian hospital compound chhungah zial zu an awm tawh lo a, boruak a thianghlim phah hle a ni.
Hetih lai hian biak in bathlara smoking area siam an awm nia sawi thawm a awm a. COTPA danin restaurant, hotel leh airport-ah te chauh smoking area siam a phal lai a, puipunna ni satliah lo, sakhaw thila mipui punkhawmna, biak in lehzela smoking area siam an lo awm a nih chuan, thil inhmeh lo tak a nih rualin mipui hriselna khawih pawi thei, dan kalh ni bawk si a ni a, hetiang thil nuai bo duhtu zawk tura ngaihte thiltih atan chuan a inhmeh lo hle a ni