By Er R. Lalthakima, Secretary,
Indian Society on Tobacco & Health, Mizoram (ISTHM)
Hqrs. Aizawl : Mizoram
-- Advertisement --
A tirah chuan World No Tobacco Day (Khawvela Meizuk Do Ni) hi WHO member ramten kum 1987-a an lo siam daih tawh a ni a, an hman hmasak ber ni erawh chu Ni 7 April 1988, WHO (World Health Organisation) din champhaphak vawi 40-naah a ni. Ni 17, May 1989-a an resolution passed angin ‘WORLD NO TOBACCO DAY’ tiin thlak a ni a, ni 31st May 1989 atang khan kum tin hman chhoh a ni ta a ni.
Mizoramah pawh he WORLD NO TOBACCO DAY hi Indian Society on Tobacco & Health, Mizoram (ISTHM)), Zuk leh Hmuam Do pawl/Pi Lal Riliani pawl chuan Ni 31st May 1989 khan Vanapa Hall Aizawlah an lo hmang tan ve daih tawh a ni. He ‘World No Tobacco Day’-ah hian zuk leh hmuam that loh thu khawlaiah Street Preaching neiin mipui hnenah zirtirna pein an lo tlangaupui tawh thin a ni. Hei vang hian Mizoram Sorkar pawh Zuk leh Hmuam Do kawngah rawn thangharh chhovin Ni 9.4.2009 khan Mizoram State Tobacco Control Society (MSTCS) a lo din ta a ni. ISTHM & MSTCS te chu pheikhai rual taka thawk hovin he World No Tobacco Day pawh hi khun khan leh urhsun takin kum tin hman ho a ni ta a ni. Aizawl veng- kawn remchang laiah vantlang mipui zirtirnate pein Zai thiamte nen Awareness Programme hman ho thin a ni. Tun hma deuh phei chuan School naupangte tan infiamna lam – Football inelna buatsaihsak a ni a, inkhel tan hmain zuk leh hmuam that lohzia zirtir an ni a, zuk leh hmuam laka fihlim turin thu an tiam thin.
Tobacco hian a huam zau hle a, heng zawng zawng hi a huam a ni : 1) Cigarettes, Cigars, Vaihlo zial, bidis, creamy snuff (Tooth paste) Kreteks, Pipes, Gutkha, Chewing tobacco, head rolling tobacco, snuff, water pipes, snees, tiranga, shikhar, Pan masala, zarda leh a dang pawh a la tam thei awm e. Heng thil tha lo ching dawklak hi khawvelah mi tam tak an awm a ni. Heng thil tha lo hian heng natna chi hrang hrang – Chronic Obstructive Pulmonary Disease (COPD), Cancer chi hrang hrang, heart attacks, strokes, chronic heart diseases, emphysema leh hrisel lohna hrang hrang a thlen thin a ni. Chuvangin heng bawiha tang mekte chhanchhuahna hna beihpui thlakna ni atan he WORLD NO TOBACCO DAY hi ni pawimawh tak leh tangkai tak a ni.
Heng vaihlo zuk leh hmuam kan tih avang hian khawvel mihring 1/10 an thi thina chhut a ni a, chutih laiin meizu hi khawvelah 1.3 billion awm anga chhut a ni. India ramah hian kum tin maktaduai khat aia tam thihna chhan hi meizuk avanga natna chi hrang hrang vang nia chhut a ni.
WORLD NO TOBACCO DAY hi Mizoramah chuan kan khawpui ber Aizawlah hman thin a ni a, kuminah erawh chuan Lungdai, Kolasib District-ah ISTHM chuan hman a tum a, NTCP(H&FW) in Buang (Champhai District) khuaah hman an tum a ni. Lungdai khua hi Mizorama ‘Tobacco Free Village 4-na tura buatsaih mek a ni nghe nghe. World No Tobacco Day hian kum tin thupui (theme) a nei thin a, kumin 2023 thupui chu ‘Grow Food, Not Tobacco tih a ni. ‘Buh ching la, Vaihlo erawh ching suh’ti ila a dik thei awm e. Tobacco Company-te hian thalai leh naupang zawk, kan tu leh fate ‘Ngawl vei’ an nih theihna turin theihtawp an chhuah reng tih hriain zirtirna tha nen kaihruai ila, keimahni pawh entawn tlakin i awm ang u.
“Naupang chu awm dan tha zirtir la, a upat hnuah pawh a thlah lo vang.” (Thufingte 22:6)
Kumin 2023 WORLD NO TOBACCO DAY denchhen hian he ni thla leh kum hi hmang tangkai ve ngei turin zuk leh hmuam kan chin dawklakte simna hun atan hman theuh i tum ang u khai.