Social audit titute intuaithar

Social Audit Unit, MISSAAT Mizoram buatsaih ‘MGNREGA & XV Finance Commission Social Audit for Block Resource Persons’ intuaitharna chu Thawhlehni khan SIRD&PR Conference Hall Leitanah neih a ni a, vawiin – Nilaini hian neih chhunzawm a ni ang.
Training hawngtu Rural Development joint secretary Paul L Khuma chuan eng hna pawh thawk ila, kan thawh tur dik tak kan chian a, taima taka kan thawh chuan hmasawnna tur leh rah chhuah tam tak a nei thin, tiin a sawi. Dik taka mipui sum hman a nih theih nan leh tha taka hna thawh a nih theih nan social audit a pawimawh em avangin, social audit kan neihin block resource person-ten uluk taka an kalpui a, thil dik lo kan hmuh chhuah pawh siamthat a nih ngei a pawimawh tih a sawi bawk. Midang chalhdelh siloa, diktak leh huaisen taka hna thawk turin a chah a ni.
Social Audit Unit, MISSAATC director Laltleipuii chuan social audit chungchang leh training neih tawh dan a sawi a. Training-ah hian Aizawl, Lunglei, Lawngtlai leh Saitual district atangin block resource person 28 an tel a, mithiam hrang hrangten an zirtir dawn a ni. Tuna tel lo, district dang zawngin April 25 & 26 hian training hi an nei ve leh ang.